Elimizde sociallıq qorǵawǵa mútáj hám mayıplıǵı bolǵan balalardı qollap-quwatlaw, olardıń densawlıǵın bekkemlew jáne hár qıylı shınıǵıwlar arqalı rawajlanıwına járdemlesiw maqsetinde bir qatar anıq hám nátiyjeli baǵdarlamalar ámelge asırılmaqta.

Rayon hákimligi Málimleme xızmeti bóliminiń maǵlıwmatına bola, Ózbekstan Respublikası Ministrler Kabinetiniń 126-sanlı qararı – “Mayıplıǵı bolǵan balalar ushın kúndizgi kútim xızmetin shólkemlestiriw is-ilajları haqqında”ǵı hújjetke tiykarlanıp, endi bunday xızmet Beruniy rayonında da jolǵa qoyıldı.
Bul joybar sheńberinde “Shirintoy sayyorasi” atlı mámleketlik emes bilimlendiriw mákemesinde imkaniyatı sheklengen balalar ushın arnawlı sharayatlar jaratıldı. Bul jerde balalar tek ǵana tárbiyalap qoymastan, al olardıń jeke rawajlanıwı, jámiyetke beyimlesiwi hám salamatlıǵı ushın zárúr sharayatlar jaratıp berilgen.
Bul baslama tek ǵana balalar emes, al olardıń ata-anaları ushın da úlken jeńillik jaratıp, olar óz jumısları menen emin-erkin shuǵıllanıw imkaniyatına iye bolǵanın atap ótiw kerek. Endi ata-analar perzentlerin isenim menen kúndizgi tárbiyalaw xızmetine tapsırıwı múmkin.
Ilajda Sociallıq qorǵaw milliy agentliginiń Qaraqalpaqstan Respublikası basqarması baslıǵı S.Daniyarov qatnasıp, bul xızmet mayıplıǵı bolǵan balalardıń turmısında unamlı ózgerislerge alıp keletuǵınına isenim bildirdi.
Aymaqtıń nuraniy kekseleri bolsa bul iygilikli hám sawaplı istiń baslanıwın qanaatlanıwshılıq penen kútip alıp, hámmeni usı múnásibet penen qutlıqladı.

Qaraqalpaqstan xabar agentligi