Senattıń Jaslar, hayal-qızlar, mádeniyat hám sport máseleleri komiteti, Ishki isler ministrligi hám Germaniya xalıqaralıq birge islesiw jámiyetiniń «Oraylıq Aziyada zorlıq ekstremizminiń aldın alıw» regionallıq joybarı menen birgelikte zorlıqqa qarsı gúresiw boyınsha uyımlararalıq jumısshı topardıń májilisi bolıp ótti.

«Zorlıqqa qarsı gúresiw boyınsha uyımlararalıq birge islesiwdegi háreketler: hayal-qızlar hám balalar huqıqlarınıń qorǵalıwı, zorlıq ekstremizmine qarsı uyımlararalıq birge islesiwdi kúsheytiw» temasında ótken usı májiliste senatorlar, Bala huqıqları boyınsha wákil, bir qatar ministrlik-uyımlardıń juwapkerleri, sonday-aq, Jaslar parlamenti aǵzaları qatnastı.
Dodalawda usı baǵdardaǵı eń áhmiyetli máseleler, sonıń ishinde, hayal-qızlar hám balalarǵa bolǵan zorlıqtıń aldın alıw, jaslar menen sistemalı islesiw, profilaktika procesinde hayal-qızlardıń belsendiligin arttırıw jáne mámleketlik uyımlar arasındaǵı birge islesiw mexanizmlerin jetilistiriw máseleleri kórip shıǵıldı.
Senat komitetiniń baslıǵı Orzigul Qozixonova áhmiyetli mashqalalardan biri bolǵan zorlıqqa qarsı gúresiwde mámleketlik hám mámleketlik emes strukturalardıń óz-ara muwapıqlastırılǵan háreketi áhmiyetli ekenligin ayrıqsha atap ótti. Bul processte jaslar hám hayal-qızlardıń qatnasın jedellestiriw, ásirese, máhálle dárejesinde erte profilaktika ilajlarınıń nátiyjeliligin arttırıw zárúr.
Senat janındaǵı Jaslar parlamentiniń baslıǵı Laylo Aslonova aymaqlarda jaslardıń media sawatlılıǵın arttırıw, bar kontentlerge sın kózqarastan pikir júrgiziw boyınsha oqıw seminarların ótkeriw usınısın bildirdi.
Ilaj juwmaǵında qatnasıwshılar alıp barılıp atırǵan jumıslardı bunnan bılay da jaqsılaw, tiyisli nızamshılıq hám birge islesiw mexanizmlerin jetilistiriw boyınsha pikir-usınıslar bildirdi.
Hár bir jumısshı topar aǵzasınıń pikir-usınıslarınan kelip shıǵıp, uyımlararalıq jumısshı topardıń jumıs rejesiniń joybarın islep shıǵıw belgilendi.

N.Abduraimova, ÓzA