Keshe Nókis qalasında futbol boyınsha Ózbekstan Pro-ligasında 9-tur sheńberinde bir oyın bolıp ótti.

Onda respublikamızdıń «Jayhun» klubı chempionat autsayderi Ferǵananıń «FARDU» komandasına qarsı oyınǵa túsip, ózleri ushın qımbatlı bolǵan bir upaydı qolǵa kirgizdi.
Atap aytqanda, ushırasıwdıń 9-minutında «FARDU» futbolshısı Ibodjon Abelfayzov «Jayhun» dárwazasına gol urıp esaptı ashqan bolsa, 77-minutta komandamız hújimshisi Asadulla Qutıbaev penaltiden esaptı teńlestiriwge eristi. Bunnan soń oyında basqa esap ózgermedi hám komandalar óz-ara bir upaydan bólisip aldı.
Endi respublikamız komandaları bolǵan «Aral» hám «Jayhun» 23-24-iyun kúnleri 10-turda Tashkenttiń «Lokomotiv» hám «Olimpik-Mobiuz» klubları menen oyınǵa túsedi.
Ótkerilgen keshegi oyınnan soń Nókistiń «Aral» klubı 16 upay toplap, turnir kestesinde ekinshi, «Jayhun» komandası bolsa, 9 upay menen 4-orındı iyelep tur.

Adilbay Orazov,
Qaraqalpaqstan xabar agentligi sholıwshısı