Berdaq atındaǵı Qaraqalpaq mámleketlik universitetinde Germaniya xalıqaralıq birge islesiw shólkemi (GIZ) wákili Beyt-Shoreyt miymanda boldı.

Ushırasıwda universitettiń xalıqaralıq birge islesiw boyınsha prorektorı Timur Nurımbetov GIZ shólkemi menen birge islesiw nátiyjeli jolǵa qoyılǵanın atap ótti. Sonıń ishinde, bilimlendiriw, ilimiy izertlewler, turizm, ekologiyalıq turaqlılıq hám sanlı innovaciyalar tarawında ámelge asırılıp atırǵan birgeliktegi joybarlarǵa toqtap ótti.
Sonday-aq, prorektor universitet jámááti atınan GIZ shólkemine tereń minnetdarshılıq bildirip, bul birge islesiw jas áwladtı zamanagóy bilimler menen qurallandırıwda áhmiyetli faktor bolıp atırǵanına toqtap ótti.
Bunnan soń Germaniya xalıqaralıq birge islesiw shólkemi (GIZ) wákili Beyt-Shoreyt universitet tárepinen islep shıǵılıp atırǵan jańa joybarlar menen jaqınnan tanıstı.
Prezentaciyalar dawamında bul joybarlardıń ilimiy hám ámeliy áhmiyetine ayrıqsha toqtap ótip, olardıń zamanagóy talaplarǵa juwap beretuǵının, regionallıq rawajlanıwǵa unamlı tásir kórsetetuǵının hám xalıqaralıq tájiriybe menen sáykesligin atap ótti.
Ótkerilgen bul ushırasıw universitettiń xalıqaralıq kólemdegi abırayın arttırıw, aldınǵı sırt el tájiriybelerin engiziw hám bilimlendiriwdiń sapasın arttırıwda áhmiyetli qádem bolıp xızmet etedi.

Qaraqalpaqstan xabar agentligi