Qaraqalpaqstan Respublikası aymaǵında zıyanlı shegirtkelerdiń 150 den aslam túri anıqlanǵan bolıp, solardan 3 túri zıyanlı dep tabılǵan. Zıyanlı shegirtkeler tiykarınan respublikamızdıń Moynaq rayonı Aralboyı átiraplarındaǵı qamıslıklarda, Aral teńizi ultanındaǵı hám Qızılqum shóllerindegi seksewil maydanlarında, sonday-aq respublikamızdıń diyqanshılıq maydanlarına jaqın bolǵan partaw jer, kollektor drenajlardıń jaǵalarında, jaylawlarda tarqalıp zıyan keltiriwi múmkin.
Qaraqalpaqstan Respublikası aymaǵında hár jılı 80-90 mıń gektar maydanda zıyanlı shegirtkelerge qarsı gúresiw jumısları alıp barıladı.
– Ɵtken jılı Tórtkúl, Beruniy, Ellikqala, Moynaq, Qońırat, Shomanay, Bozataw, Kegeyli, Shımbay, Qaraózek hám Taxtakópir rayonlarında, jámi 88859 gektar maydanda ziyanlı shegirtkeler tarqaldı hám olarǵa qarsı ximiyalıq ilajlar ámelge asırılıp, awıl-xojalıǵı hám mádeniy eginlerge qáwip salmay turıp ѳz waqtında qáwip qáterdiń aldı alındı,-deydi Qaraqalpaqstan Respublikası Shegirtke hám tut zıyankesine qarsı gúresiw xızmeti bas agronomı Atabek Daukov.
Zıyanlı shegirtkege qarsı gúresiw máwsimin sapalı ótkeriw ushın materiallıq-texnikalıq baza jaratılǵan bolıp, janılǵı hám ximiyalıq qurallar rezervi toplanǵan. Sonıń ishinde, Qaraqalpaqstan Respublikasında ximiyalıq qayta islew rejelestirilip atırǵan 112 000 gektar maydan bolıp, 11 otryad shólkemlestirilgen. Qarsı gúreske tartılatuǵın texnikalardıń jámi sanı 115 dana.
Atap aytqanda, motorlı aspa qol búrkegishleri 81 dana, traktor búrkegishleri 19 dana, avtomashinaǵa ornatılǵan UMO búrkegishleri 9 dana, suw tasıw texnikası 3 dana, suw tasıw tirkemesi 3 dana.
Qaraqalpaqstan Respublikasında zıyanlı shegirtkelerdiń rawajlanıwı hám tarqalıwına qolaylı 3 million gektardan aslam jer maydanı bar. Ótken jılǵı gúzgi baqlaw nátiyjelerine bola 112 mıń gektar jer maydanında zıyanlı shegirtkeler tárepinen máyek qoyılǵanı anıqlandı.
Respublikamızda shegirtkelerge qarsı ximiyalıq qayta islew jumısları 14-may kúninen baslanıp, 16-iyun jaǵdayına bola jámi 32 mıń 254 gektar maydanda ximiyalıq gúres jumısları alıp barıldı.
Zıyanlı shegirtkelerdiń tarqalıwınıń aldın alıw, awıl xojalıǵı eginleri, seksewilzarlar hám jaylawlardıń zıyanlanıwına jol qoymaw ushın barlıq zárúr ilajlar kórilmekte.

Qaraqalpaqstan xabar agentligi.