Ózbekstanda sanlı transformaciya procesinde global texnologiyalıq gigantlar menen birge islesiw ayrıqsha áhmiyetke iye bolmaqta. Usı kózqarastan, Meta kompaniyası menen jolǵa qoyılǵan birge islesiw málimleme qáwipsizligi, sanlı sawatlılıq tarawlarında áhmiyetli qádem bolıp esaplanadı.

Meta kompaniyasınıń Aziya hám Tınısh okeanı regionı boyınsha mámleketlik siyasat máseleleri boyınsha vice-prezidenti Simon Milner basshılıǵındaǵı delegaciyanıń IT Park Uzbekistan’ǵa saparı Ózbekstannıń sanlı rawajlanıw jolında xalıqaralıq IT-ekosistemaǵa integraciyalasıwın kúsheytedi.
Sapar sheńberinde miymanlarǵa IT Park’tiń jumısı, onda jaratılǵan ekosistema, perspektivalı joybarlar hám investorlar ushın jaratılǵan sharayatlar haqqında tolıq maǵlıwmat berildi.
Bunnan soń, delegaciya UzSoc orayı menen jaqınnan tanıstı. Orayda málimleme qáwipsizligi, sociallıq tarmaqlardaǵı monitoring hám basqa da baǵdarlar boyınsha alıp barılıp atırǵan jumıslarǵa toqtap ótildi.
Sonday-aq, miymanlar UZINFOCOM orayına barıp, ol jerde sanlı infrastruktura, maǵlıwmatlar orayları hám zamanagóy texnologiyalar tiykarında kórsetilip atırǵan xızmetler menen tanıstı.
Sapardıń tiykarǵı bóliminde delegaciya sanlı texnologiyalar ministri Sherzod Shermatov penen ushırastı. Ushırasıw dawamında eki tárepleme birge islesiw perspektivaları, kontent siyasatı, jaslar potencialın arttırıw, jasalma intellekt, sanlı ekonomika hám sociallıq tarmaqlarda qáwipsizlikti támiyinlew máseleleri dodalandı.
Juwmaǵında bul ushırasıw Meta kompaniyası hám ministrlik arasında ashıq sóylesiw hám strategiyalıq birge islesiwdi rawajlandırıw jolındaǵı áhmiyetli qádemlerden biri bolıp xızmet etetuǵını atap ótildi.

N.Rahmonova, ÓzA