Ózbekstan Respublikası Prezidentiniń 2021-jıl 13-apreldegi «Byudjet processinde puqaralardıń belsene qatnasıwın támiyinlew boyınsha qosımsha ilajlar haqqında»ǵı qararı tiykarında, Ózbekstan Respublikası Qarjı ministrliginiń «Ashıq byudjet» portalı iske túsirilgen edi.

Búgingi kúni respublikamızdıń barlıq aymaqlarınıń puqaraları bul joybarda qatnasıp, jeńimpaz bolǵan aymaqlardıń bir qatar mashqalaları orınlanıp atır.
Atap aytqanda, joybar tiykarında dawıs beriw juwmaǵı menen eń kóp dawıs toplaǵan 8 joybardan Mádeniyat awıl puqaralar jıyını boyınsha 4 joybar jenimpaz dep tabıldı hám aymaqta jol qurılısı jumısları baslap jiberildi.
Sonnan jıyın orayınan Qaramoyın awılına shekemgi 11-13 km aralıǵına, Ótegen awılına shekemgi 9-11 km, Ferma awılına shekemgi 3-7 km hám Qaramoyın awılına shekemgi 13-15 km aralıǵına «DANIYAR AVTO SERVIS» jámiyeti jolshıları tárepinen qurılıs ońlaw jumısları baslap jiberildi.
-Húrmetli Prezidentimizdiń qararı tiykarında iske túsirilgen «Ashıq byudjet» portalı xalqımız ushın oǵada jaqsı boldı,-deydi Mádeniyat awıl puqaralar jıyını turǵını Erkinbay Xojambergenov.-Ótken jılı da awılımız turǵınları usı portal arqalı jeńimpaz bolıp, Sharwa awılǵa baratuǵın 2 km jolımız asfaltlanǵan edi. Bıyıl jáne usı qurılıs jumısları dawam etip, qalǵan jollarımız da ońlanıp atır. Bunıń ushın Prezidentimizge, respublika hám rayon basshılarına úlken raxmet aytamız.
Bul qurılıs isleri usı jıldıń iyul ayında juwmaqlanıwı rejelestirilgen hám házirgi kúnleri ońlaw jumısları qızǵın alıp barılmaqta.

Adilbay Orazov,
Qaraqalpaqstan xabar agentligi sholıwshısı.