Qaraqalpaqstan Respublikası Salıq basqarması tárepinen aymaqlarda kishi hám orta biznesti rawajlandırıw, olardıń jumısına tosqınlıq etip atırǵan mashqalalardı saplastırıw maqsetinde isbilermenler menen ashıq pikirlesiwler shólkemlestirilmekte.

Usınday gezektegi ushırasıw Beruniy rayonında ótkerildi,- dep maǵlıwmat beredi rayon hákimligi Málimleme xızmeti bólimi. Onda rayon isbilermenleri hám salıq uyımlarınıń wákilleri qatnastı.
Ushırasıwda Salıq basqarması basshıları tikkeley sóylesiw túrinde isbilermenler menen ushırasıp, olardı qızıqtırǵan sorawlarǵa juwap berdi. Kishi hám orta biznes subyoektlerin qollap-quwatlaw, olarǵa jaratılǵan jeńillikler hám salıq jeńillikleri haqqında hár tárepleme maǵlıwmatlar berildi.
Sonday-aq, salıq uyımları tárepinen jasırın ekonomikalıq jumıslardıń aldın alıw, rásmiy emes isbilermenlikti nızamlı maydanǵa alıp shıǵıw boyınsha ámelge asırılıp atırǵan jumıslar haqqında sóz etildi.
Bunday sóylesiwler isbilermenler menen ashıq hám nátiyjeli baylanıs ornatıw, olar dus kelip atırǵan mashqalalardı úyrenip, ámeliy sheshimler islep shıǵıwda úlken áhmiyetke iye.

Qaraqalpaqstan xabar agentligi