Ellikqala rayonında xalıq ushın zárúr bolǵan azıq-awqat hám awıl xojalıǵı ónimlerin múnásip bahalarda usınıw maqsetinde arnawlı arzanlastırılǵan sawda yarmarkası shólkemlestirildi. Bul yarmarka rayon hákimliginiń baslaması hám ámeliy járdemi menen ámelge asırılmaqta, – dep maǵlıwmat beredi rayon hákimligi Málimleme xızmeti bólimi.

Yarmarka Ellikqala diyqan bazarı aymaǵında ótkerilmekte. Bul jerde rayon aymaǵında jumıs alıp barıp atırǵan fermer hám diyqan xojalıqlarına ózleri jetistirgen barlıq túrdegi awıl xojalıǵı, baǵshılıq, ovoщ hám palız ónimlerin tikkeley tutınıwshıǵa jetkeriw ushın barlıq zárúr sharayatlar jaratıp berildi.
Bas prokuratura janındaǵı Ekonomikalıq jınayatlarǵa qarsı gúresiw departamentiniń rayonlıq bólimi xızmetkerleri tárepinen bahanıń turaqlılıǵın támiyinlew hám ónim jetispewshiliginiń aldın alıw maqsetinde turaqlı monitoring alıp barılıp atırǵanın atap ótiw kerek.
Sonday-aq, yarmarka sawdasında qatnasıp atırǵan isbilermenler qadaǵalaw-kassa mashinaları hám tólem terminallarınan belsene paydalanbaqta. Sanitariya talapları, sonıń ishinde, karantin qaǵıydalarına ámel etiliwi qatań qadaǵalawǵa alınǵan.
Bunday yarmarkalar xalıqtıń talabın qanaatlandırıw, isbilermenlerge jańa bazar imkaniyatların jaratıw hám jergilikli ekonomikanı rawajlandırıwǵa xızmet etedi.

Qaraqalpaqstan xabar agentligi