Bir neshe kúnnen berli dawam etip atırǵan «Áhmiyetli 90 kún» joybarı sheńberindegi ilajlar Qanlıkól rayonındaǵı Jayxun máhállesinde de bolıp ótti.
Maqset – jaslardı hár tárepleme qollap-quwatlaw, olardıń bos waqıtların mazmunlı shólkemlestiriw, ruwxıy-aǵartıwshılıq hám fizikalıq rawajlanıwına járdem beriwden ibarat.
Máhállede oqıwshılardıń shaxmat-shashka hám stol tennisi sport túrlerinen jarısları shólkemlestirildi.
Usınday ilaj rayondaǵı Sarı altın awıl puqaralar jıyınında da ótkerildi.
Usı aymaqta jaylasqan 2-sanlı mámleketlik mektepke shekemgi bilimlendiriw shólkeminde “Áhmiyetli 90 kún” joybarına tiykarlanıp, balalardıń jazǵı dem alısın mazmunlı ótkeriw, dene shınıǵıwların ótkerip sporttıń gimnastika túrine qızıqtırıw maqsetinde tárbiyalanıwshı qızlar arasında “Kórkem gimnastika” atamasında tańlaw ótkerildi.
Tańlaw dawamında tárbiyalanıwshılar gimnastika boyınsha óz sheberligin kórsetip, olar húrmet jarlıqlar menen sıylıqlandı.
Qaraqalpaqstan xabar agentligi