Qaraqalpaqstan Respublikası Mektepke shekemgi hám mektep bilimlendiriwi ministrligi, olimpiada mektebi hám Qońırat rayonı hákimligi menen birgelikte ulıwma orta bilim beriw mektepleriniń 7-8-klass oqıwshıları arasında matematika hám ximiya pánlerinen óz aldına, 9-11-klass oqıwshılar arasında matematika páninen “Qońırat rayonı Hákim olimpiadası” ótkerildi.

Bul olimpiadaǵa 240 tan aslam 7-11-klass oqıwshıları qatnasıp, óz bilimlerin sınaqtan ótkerdi.
Olimpiada juwmaǵında 7-8-klass oqıwshıları arasında matematika páninen Nókis qalasındaǵı 2-sanlı qánigelestirilgen mekteptiń 8-klass oqıwshısı F.Umirbaev birinshi, Qońırat rayonındaǵı 43-sanlı mekteptiń 7-klass oqıwshısı S.Muratbaev ekinshi, Qánigelestirilgen mekteptiń 7-klass oqıwshısı O.Mamutov úshinshi orındı iyeledi.
Al, fizika páninen 1-orındı Qońırat rayonındaǵı 33-sanlı mekteptiń 8-klass oqıwshısı A.Sársenbaev, 2-orındı Ellikqala rayonındaǵı 5-sanlı mekteptiń 8-klass oqıwshısı M.Begmametova, 3-orındı Nókis qalasındaǵı 45-sanlı mekteptiń 8-klass oqıwshısı A.Qurbaniyazovlar iyelegen bolsa, 9-11-klass oqıwshıları arasında matematika páninen 1-orın Nókis qalasındaǵı 2-sanlı qánigelestirilgen mekteptiń 10-klass oqıwshısı S.Saparbaev, 2-orın Qońırat rayonındaǵı 4-sanlı mekteptiń 10-klass oqıwshısı J.Kuwatova, 3-orın usı rayondaǵı 33-sanlı mekteptiń 10-klass oqıwshısı I.Nazerovlarǵa berildi.
Jeńimpaz oqıwshılar Qonırat rayonı hákimligi tárepinen tayarlanǵan diplom hám bahalı sawǵalar menen sıylıqlandı.

Qaraqalpaqstan xabar agentligi