Xorezm wálayatı Xiywa qalasında ulıwma bilim beriw mektepleriniń 8-10-klasslarınıń oqıwshıları arasında «Jaslıq sport jámáátleri» sport jarıslarınıń respublikalıq final basqıshı bolıp ótti.
Jarısta Qaraqalpaqstan Respublikası, wálayatlar hám Tashkent qalasınan kelgen komandalar óz-ara kúsh sınastı.
Qızıqlı ótken jarıs juwmaǵında, ul balalar hám qızlar komandaları arasında ózleriniń barlıq qarsılasların jeńip shıǵıwǵa miyasar bolǵan, Qaraqalpaqstan Respublikası komandası birinshi orındı iyelewge eristi.
Ul balalar arasında ótkerilgen jarısta 2-3-orınlardı Sırdárya hám Ferǵana wálayatları komandaları qolǵa kirgizgen bolsa, qızlar arasında Surxandárya hám Qashqadárya wálayatlarınıń jasları iyeledi.
Jarısta jeńimpaz komandalar hám olardıń trenerleri menen birgelikte oyınlardı ádil basqarǵan tóreshilerge Ózbekstan «Yoshlik» dene tárbiya hám sport jámiyeti Oraylıq keńesiniń estelik sawǵaları tapsırıldı.
Jeńimpaz komandalarımızdı jarısqa Gúljáhan Qalmuratova hám Sergey Shakirovlar tayarladı.
Adilbay Orazov,
Qaraqalpaqstan xabar agentligi sholıwshısı.