Awıl xojalıǵı mámleketimiz ekonomikasınıń tiykarǵı tarmaqlarınan biri bolıp, bul tarawdı modernizaciyalaw, diversifikaciyalaw, tarawǵa investiciyalardı keńnen tartıw hám payda alıwdı gózlegenlerdi qollap-quwatlaw mámleketlik siyasattıń áhmiyetli baǵdarlarınan biri sıpatında belgilengen.
Bul baǵdarda ámelge asırılıp atırǵan jumıslar menen jaqınnan tanısıw, bar imkaniyatlar hám máselelerdi úyreniw maqsetinde Qaraqalpaqstan Respublikası Awıl xojalıǵı ministriniń ekonomika hám azıq-awqat qáwipsizligi boyınsha orınbasarı I.Qurbonovtıń basshılıǵındaǵı jumısshı topar Taxtakópir rayonında boldı.
Taxtakópirde ásirese, kóp tarmaqlı fermer xojalıqların shólkemlestirgen isbilermenlerdiń xızmetleri dıqqatqa ılayıq. Atap aytqanda, Qaraoy awıl puqaralar jıyını aymaǵında jaylasqan “KAUSAR TEGIRMON” JShJ tárepinen ulıwma bahası 32 milliard sumlıq mal sharwashılıǵın rawajlandırıw hám sútti qayta islewge baylanıslı iri joybarlar ámelge asırılmaqta.
Házirgi waqıtta kárxananıń mal sharwashılıq kompleksinde 120 bas zatlı qara mal tárbiyalanbaqta. Sonıń menen birge, sútti qayta islew joybarı da iske qosılıp, 7 puqaranıń turaqlı jumıs penen támiyinleniwi ámelge asırıldı.
Sonday-aq, usı jámiyet tárepinen bahası 878 mıń AQSh dollarına teń bolǵan “Júndi qayta islew” joybarı ámelge asırılmaqta. Bul joybar usı baǵdardaǵı dáslepki sanaat baslamalarınan biri bolıp, keleshekte jergilikli xalıqtıń jumıs penen támiyinleniwin arttırıwǵa xızmet etiwi kútilip atırǵanın atap ótiw kerek.
Isbilermen, sonday-aq, dán hám dán ónimlerin qayta islew boyınsha zamanagóy iri zavod qurıwdı da rejelestirgen. Házirgi waqıtta zavod ushın sırt elden alıp kelingen aldıńǵı texnologiyalardı ornatıw jumısları baslanǵan.
Jumısshı topar sapar dawamında “Taxtakópir nan ónimleri” JShJ xızmeti menen de jaqınnan tanıstı. Bul jerde gúzge shekem tuqımlıq biydaydı tazalaw, saylap alıw hám dárilew processleri jolǵa qoyıladı.
Bul joybar ushın “Biznesti rawajlandırıw banki” tárepinen 108,7 mıń AQSh dolları muǵdarında kredit ajıratılǵan bolıp, usı qarjılardıń esabınan Túrkiya texnologiyaları tiykarında zamanagóy liniyalar ornatılıwı rejelestirilgen.
Sapar dawamında Inomjon Qurbonov hám juwapker xızmetkerler isbilermenler menen sáwbetlesip, olardıń jumısında ushırasıp atırǵan máselelerdi úyrenip shıqtı hám olardı saplastırıw boyınsha ámeliy ilajlardı belgilep aldı.
Awıl xojalıǵında bunday joybarlardıń kóbeyiwi aymaqlar ekonomikasınıń rawajlanıwına, jańa jumıs orınlarınıń jaratılıwına hám azıq-awqat qáwipsizliginiń bekkemleniwine xızmet etetuǵını sózsiz.
Qaraqalpaqstan xabar agentligi