Awıl xojalıǵı ministrligi, Jáhán banki hám Qaraqalpaqstan awıl xojalıǵı hám agrotexnologiyalar institutı menen birgelikte Nókis qalasındaǵı “Aq quw” kompleksinde “Ózbekstanda klimat ózgeriwi jaǵdayında aqıllı awıl xojalıǵı” atamasında seminar-trening shólkemlestirdi.
Onda Qaraqalpaqstan Respublikası Joqarǵı Keńesi, tiyisli ministrliklerdiń wákilleri, xalıqaralıq shólkemler hám sırt elli ekspertler hám Qaraqalpaqstan awıl xojalıǵı hám agrotexnologiyalar institutı qánigeleri qatnastı.
Seminarda klimat ózgeriwine beyimlesiw, aqıllı awıl xojalıǵı ámeliyatları hám Aralboyında agro-ekosistema jaratıw máseleleri dodalandı.
Seminarda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Ózbekstan Respublikası Awıl xojalıǵı ministriniń orınbasarı A.Shukurov, Jáhán bankiniń awıl xojalıǵı boyınsha úlken ekonomisti Dr.Pierre Gerber, Awıl xojalıǵında bilim hám innovaciyalar milliy orayınıń direktorı professor Sh.Namazov hám basqalar shıǵıp sóylep, seminardıń áhmiyeti, búgingi kúnde ámelge asırılıwı kerek bolǵan ilajlarǵa toqtap ótti.
Seminarda klimat ózgeriwin jumsartıw hám Aralboyı aymaqlarınıń ekologiyalıq turaqlılıǵın tiklewge qaratılǵan ilimiy izertlewler haqqında bayanatlar islendi.
Bul seminar arqalı búgingi kúndegi klimat ózgeriwi tek ǵana awıl xojalıǵına emes, al bazar ekonomikasına, sol aymaqta jasap atırǵan insanlardıń salamatlıǵına, topıraq, klimat ózgeriwi arqalı aymaqtıń ekologiyasına da úlken tásir etetuǵını ayrıqsha atap ótildi.
Klimat ózgeriwin jumsartıw hám Aralboyı regionında ekologiyalıq turaqlılıqtı tiklew boyınsha ilimiy izertlew institutları, xalıqaralıq shólkemlerdiń wákilleri búgingi kúndegi alıp barılıp atırǵan izertlewlerge súyengen halda alıp barılıp atırǵan ilimiy jumıslar haqqında qatnasıwshılarǵa óz bayanatların usındı.
Seminar sheńberinde qatnasıwshılar ushın Moynaq hám Aral teńizi tariyxı muzeyine sayaxat shólkemlestirildi.
Qaraqalpaqstan xabar agentligi