Qaraqalpaqstan Respublikası Ministrler Keńesiniń Baslıǵı F. Ermanov pitkeriwshi jaslarǵa miynet bazarındaǵı bar imkaniyatlar haqqında tolıq maǵlıwmat beriw, olardıń bántligin támiyinlewde ámeliy járdem kórsetiw, sonday-aq, olardıń baslamaların tıńlaw hám mashqalalarına sheshim tabıw maqsetinde, Ájiniyaz atındaǵı Nókis mámleketlik pedagogikalıq institutınıń pitkeriwshi jasları menen ushırastı.
Ilajǵa institut rektorı Q. Qadirov basshılıǵındaǵı institut prorektorları, barlıq fakultet dekanları, dekan orınbasarları, tiyisli ministrlikler hám shólkemlerdiń basshıları hám pitkeriwshi student-jaslar qatnastı.
Ushırasıwda F. Ermanov shıǵıp sóylep, Ózbekstan Respublikası Prezidentiniń 2025-jıl 14-fevraldaǵı PQ-61-sanlı “Joqarı bilimlendiriw mákemeleri pitkeriwshileriniń jumısqa ornalasıwına járdemlesiw boyınsha qosımsha ilajlar haqqında”ǵı qararınıń áhmiyeti haqqında keń túrde túsinik berdi.
Bul qarar, bárinen burın, pitkeriwshilerdiń miynet bazarına sáykes túrde tayarlanıwın, olardıń qánigeligi boyınsha jumısqa ornalasıwın sistemalı jolǵa qoyıwdı názerde tutadı. Ushırasıwda usı qarar sheńberinde ámelge asırılıp atırǵan jumıslar, ásirese, Qaraqalpaqstan Respublikasında bul baǵdardaǵı ámeliy ilajlar ayrıqsha atap ótildi.
Bunnan soń, student-jaslar tárepinen ózlerin qızıqtırǵan máseleler boyınsha sorawlar berilip, olarǵa juwap aldı.
-Sorawlar tiykarınan, pitkeriwshilerdiń jumıs penen bántligi, bos jumıs orınları, jumıs beriwshiler menen baylanıslar, isbilermenlik jumısın baslaw imkaniyatları, mámleket tárepinen berilip atırǵan jeńillikler, sonday-aq, sociallıq qorǵaw máselelerine qaratıldı,-deydi instituttıń Málimleme xızmeti baslıǵı Islam Matekov.-Ushırasıwda taraw qánigeleri, ministrlikler hám shólkemlerdiń wákilleri jaslardıń sorawlarına hár tárepleme juwap berip, bar imkaniyatlar hám baǵdarlamalar haqqında maǵlıwmatlar berdi.
Ilaj sońında F. Ermanov pitkeriwshi jaslarǵa isenim bildirip, olardı belsendi, pidayı bolıwǵa shaqırdı. Sonday-aq, hár bir jastıń bántligi hám keleshegi mámleket itibarında ekenin, bul baǵdarda barlıq zárúr ilajlar kórilip atırǵanın atap ótti.
Bul ushırasıw student-jaslar ushın tek ǵana motivaciyalıq ruwx emes, al, ámeliy jaqtan paydalı bolǵan pikirlesiw maydanına aylandı. Ushırasıw dawamında bildirilgen usınıs hám múrájatlar boyınsha juwapker shólkemlerge tiyisli tapsırmalar berildi.
Qaraqalpaqstan xabar agentligi