Ellikqala rayonında jámiyette insanıylıq hám keńpeyillik qádiriyatların bekkemlewge qaratılǵan gezektegi donorlıq ilajı shólkemlestirildi.

Bul iygilikli akciya Ózbekstan “Adolat” social-demokratiyalıq partiyası Ellikqala rayonlıq Keńesiniń baslaması menen rayonlıq medicina birlespesi janındaǵı qan quyıw orayında bolıp ótti.

“Bar mehrimiz saǵan balajan” súreni astında ótkerilgen bul ilajdıń tiykarǵı maqseti – qanǵa mútáj bolǵan balalarǵa biypul járdem kórsetiw, sol arqalı jámiyette ıqtıyarıy donorlıq mádeniyatın keńnen úgit-násiyatlawdan ibarat boldı.
Rayon hákimligi Málimleme xızmeti bóliminiń maǵlıwmatına bola, ilajda Ellikqala rayonı ishki isler bólimi xızmetkerleri, medicina birlespesiniń shıpaker hám miyirbiykeleri, partiya belsendileri, sonday-aq, bir topar ıqtıyarlı donorlar belsene qatnastı. Olar awır jaǵdaydaǵı nawqaslarǵa ómir baǵıshlaw jolında biyǵárez hám iygilikli isti ámelge asırdı.
Bunday akciyalar xalıq arasında óz-ara tilekleslik, adamgershilik hám jámiyetke paydalı bolıw sezimin kúsheytiwge xızmet etedi. Sonıń menen birge, medicina mákemelerinde turaqlı qan rezervin jaratıwǵa da ámeliy járdem beredi.

Qaraqalpaqstan xabar agentligi