Qaraózek rayonında Ózbekstan Respublikası Prezidentiniń 2024-jıl 30-dekabrdegi PQ-465-sanlı qararınıń orınlanıwın támiyinlew maqsetinde seminar ótkerildi.

Onda atız shetleri, kanallar, suwǵarıw hám kollektor-drenaj tarmaqları átirapındaǵı maydanlarda, xalıqtıń qıytaq jerleri, xojalıqlar hám kóp qabatlı turaq jaylar aldı hám awıl-aymaqlardaǵı ishki kóshelerde awıl xojalıǵı ónimlerin jetistiriwdi shólkemlestiriw máseleleri dodalandı.
Qaraózek, Shımbay hám Taxtakópir rayonlarınıń Karantin agentligi, Fermerler keńesi hám basqa da awıl xojalıǵı tarawı wákilleri, diyqan-fermerler hám qıytaq jer iyeleri qatnasqan ilajda, tiyisli taraw basshıları hám qánigeleri tárepinen Prezident qararınıń áhmiyeti, onda belgilengen jeńillikler túsindirilip, atız shetleri hám kollektor-drenaj átiraplarınan nátiyjeli paydalanıw, egilgen miywe nállerin hám palız eginlerin tárbiyalaw haqqında da keń túrde maǵlıwmatlar berildi.
Seminarda sonday-aq, awıl xojalıǵı kooperaciyaların shólkemlestiriw hám júrgiziw máseleleri haqqında da sóz etildi.
Maǵlıwmat ushın, aytıp ótetuǵın bolsaq, 2025-jılı Qaraózek rayonında atız shetlerindegi 39 gektar maydanǵa hám suwǵarıw hám kollektor-drenaj átirapındaǵı 7 gektar maydanǵa miywe nálleri, palız eginleri, ovoщ hám sobıqlı ósimlikler egilgen,-deydi Qaraqalpaqstan Respublikası Ósimlikler karantini hám qorǵaw agentligi Atız shetinde ónim jetistiriwdi shólkemlestiriw hám muwapıqlastırıw bólimi baslıǵı Muratjan Djumatov.-Bul egilgen nállerge aymaqlarǵa biriktirilgen fitosanitariyalıq qadaǵalaw mámleketlik inspektorları tárepinen monitoring ótkerilip, onıń nátiyjeleri boyınsha maǵlıwmatlar “E-fito” baǵdarlamasındaǵı «Atız qadaǵalawı» platformasına tolıq kirgizilip, dizimge alınǵan. Seminarda qatnasıwshılar tárepinen qánigelerge sorawlar berilip, olarǵa juwap aldı.

Adilbay Orazov,
Qaraqalpaqstan xabar agentligi sholıwshısı