Qaraqalpaqstan Respublikası sudınıń baslaması menen «Jańa redakciyada qabıl etilgen Ózbekstan Respublikasınıń Miynet kodeksi boyınsha kadrlar jumısların shólkemlestiriw hám miynetke baylanıslı hújjetlerdi rásmiylestiriw» atamasında seminar ótkerildi.

Seminarǵa Qaraqalpaqstan Respublikası Ádillik ministrligi, Mektepke shekemgi hám mektep bilimlendiriwi ministrligi, Mámleketlik salıq basqarması, «Respublikalıq tez medicinalıq járdem orayı» Qaraqalpaqstan filialı, Ekologiya hám qorshaǵan ortalıqtı qorǵaw komiteti, AKB «Xalıq banki», «Qaraqalpaq suw támiynatı» AJ, Nókis mámleketlik toǵay xojalıǵınıń xızmetkerleri hám usı shólkemlerdiń kadrlar islerine juwapker xızmetkerleri hám Qaraqalpaqstan Respublikası sudınıń puqaralıq isleri boyınsha sudlaw kollegiyası hám rayonlar aralıq (rayon) sudlarınıń sudyaları qatnastı.
Ilajdı Qaraqalpaqstan Respublikası Sudı baslıǵınıń orınbasarı B.Qtaybekov basqarıp bardı.
Seminarda tiykarınan, Ózbekstan Respublikası Joqarǵı sudı Plenumınıń «Sudlar tárepinen miynet shártnamasın biykarlawdı tártipke salıwshı nızamshılıqtı qollanıw ámeliyatı haqqında»ǵı 2023-jıl 20-noyabrdegi 26-sanlı qararın úyreniw, Ózbekstan Respublikası Miynet kodeksiniń 161-statyası, 2-bólimi, 2, 4-5-bántlerine tiykarlanıp miynet shártnamasın biykarlaw tiykarları haqqında sóz etildi.
-Ózbekstan Respublikası Joqarǵı sudı Plenumınıń 2023-jıl 20-noyabrdegi «Sudlar tárepinen miynet shártnamasın biykar etiwdi tártipke salıwshı nızamshılıqtı qollanıw ámeliyatı haqqında»ǵı 26-sanlı qararı búgingi kúni sud-huqıq ámeliyatında ayrıqsha áhmiyetke iye bolmaqta,-deydi Qaraqalpaqstan Respublikası Sudınıń sudyası Miyrigul Daumenova.-Bul qararda sudlar tárepinen miynet shártnamalarınıń biykar etiliwi menen baylanıslı islerdi kórip shıǵıwda birden-bir qatnastı qáliplestiriw, ámeldegi nızamshılıq normaların durıs hám birdey qollanıw, xızmetkerlerdiń miynet huqıqların isenimli qorǵawǵa qaratılǵan áhmiyetli usınıslar bildirildi. Usı Plenum qararı miynet huqıqlarınıń kepillikli qorǵalıwın támiyinlewde áhmiyetli normativlik-huqıqıy dárek sıpatında xızmet etpekte. Sonıń menen birge, miynet kelispewshilikleri boyınsha sud qararlarınıń tiykarlanǵanlıǵı hám ádilligin arttırıwǵa xızmet etedi.
Seminarda bayanatshılar tárepinen atap ótilgenindey, miynet kelispewshiliklerin sheshiwde sudlar tárepinen bir qatar jumıslar ámelge asırılǵan.
Hár qanday shólkemde miynet nızamshılıǵına qatań ámel etilse, jumısshı-xızmetkerlerdiń huqıqları menen mápleri buzılmaydı. Bul baǵdarda jańa redakciyadaǵı Miynet kodeksi hám basqa da nızam talapların tereń úyreniw, olardıń áhmiyetin keńnen úgit-násiyatlaw úlken áhmiyetke iye.
Seminarda qatnasıwshılar tárepinen nızamshılıǵımızǵa kirgizilgen jańa ózgerisler boyınsha sorawlar berilip, olarǵa juwap aldı.

Adilbay Orazov,
Qaraqalpaqstan xabar agentligi sholıwshısı.