Boston Consulting Group kompaniyasınıń basqarıwshı direktorı Rza Nuriev Tashkent xalıqaralıq investiciya forumında Qaraqalpaqstandı 2035-jılǵa shekem rawajlandırıw strategiyasın usındı. «Qaraqalpaqstan tek ǵana Ózbekstanda emes, al pútkil Oraylıq Aziyada ósiw boyınsha jetekshige aylanıw ushın úlken potencialǵa iye, dep esaplayman», – dedi Nuriev.

Esap-sanaqlarǵa bola, aymaqtıń ekonomikalıq ósiw pátleri 2035-jılǵa barıp, jılına 6 procentke shekem kóteriliwi múmkin. Bul ósim tórt tarawǵa tiykarlanadı: energetika, sanaat, awıl xojalıǵı hám turizm, dedi Nuriev.
Onıń sózlerine bola, energiya islep shıǵarıw kólemi jeti esege – 1,5 ten 11 GVt ǵa artadı. Regionda 60 GVt dan aslam samal islep shıǵarıw potencialı bar. Derlik 10 GVt «jasıl» samal energiyası boyınsha joybarlar álle qashan rejelestirilgen.
Málim etiliwinshe, strategiyanı ámelge asırıw boyınsha tolıq jol kartası islep shıǵılǵan hám prezident administraciyası janında «anıq basqarıw sistemasına hám zárúr byudjetlerge iye».

Qaraqalpaqstan xabar agentligi