Búgin Tashkenttegi “SAEX UZBEKISTAN” xalıqaralıq kórgizbe orayında Tashkent xalıqaralıq investiciya forumı óz jumısın juwmaqladı.

Usı múnásibet penen bul orayda Ózbekstan Respublikası Investiciyalar, sanaat hám sawda ministri Laziz Qudratovtiń qatnasıwında brifing ótkerildi.
Laziz Qudratov óziniń shıǵıp sóylegen sóziniń aldında Oraylıq Aziyadaǵı eń iri investiciya platforması – IV Xalıqaralıq investiciya forumı tabıslı ótkenin qanaatlanıwshılıq menen málim etti.
– Ózbekstan Prezidenti Shavkat Mirziyoev eki iri ilaj – forumnıń ashılıwnda qatnastı hám Sırt el investorları keńesiniń 3-sesiyasına basshılıq etti. Bul áhmiyetli ushırasıwlar jetekshi xalıqaralıq investorlar, mámleketlik uyımlar, qarjı institutları hám biznes wákillerin birlestirdi.
Usı jılı forumǵa 8 mıńnan aslam delegat, sonıń ishinde, 97 mámleketten 3 mıńǵa shamalas sırt el miymanları keldi. Bunday keń kólemli qatnasıq Ózbekstanǵa bolǵan isenim hám qızıǵıwshılıqtıń artıp baratırǵanınan dárek beredi.
Sonday-aq, forumda 150 den aslam belgili spikerdiń qatnasıwında 36 panel sessiyası bolıp ótti. Tashkent investiciya forumında birinshi márte sanaat kórgizbesi ótkerildi. 12 mıń kvadrat metr maydandı iyelegen kórgizbede elektrotexnika, farmacevtika, azıq-awqat sanaatı, toqımashılıq, bılǵarı sanaat, qurılıs materialları, mashina qurılısı, taw-kán sanaatı, metallurgiya, energetika, avtomil qurılısı, ximiya, qarjı xızmetleri, IT, turizm hám basqa tarawlarda sırt el investorları ushın joybar usınısların usınǵan 100 ge shamalas jergilikli kárxanalar kórsetildi.
Hár kúni kórgizbege 2000 nan aslam adam keldi, 500 den aslam B2B hám B2G ushırasıwlar ótkerildi.
Forum sheńberinde ulıwma bahası 30,5 milliard dollarlıq investiciya hám sawda kelisimlerine qol qoyıldı.
Kelesi jılı sizdi jańa ideyalar, aldınǵı baslamalar hám innovaciyalıq formatlar menen Tashkentte kútip alamız. Hámmeńizge úlken miynetińiz hám pidayılıǵıńız ushın raxmet aytaman, – dedi birifing juwmaǵında ministr.

N. Ziyodullaeva, O. Pardaev (súwret), ÓzA