IV Tashkent xalıqaralıq investiciya forumı sheńberinde Qaraqalpaqstandı 2035-jılǵa shekem rawajlandırıw boyınsha uzaq múddetli strategiya islep shıǵıldı, dedi Prezident járdemshisi.

Atap ótiliwinshe, ótken jıl dawamında bul region ushın bir qatar sóylesiwler alıp barılǵan, baǵdarlamalar iske qosılǵan hám qarjı resursları qaratılǵan. Bul baslamalardı «Boston Consulting Group» kompaniyası menen birgelikte islep shıǵılǵan strategiyalıq reje tolıqtıradı.
– Maqsetimiz tek ǵana investiciya alıp keliw emes, al kirgizilgen investiciya jergilikli xalıqqa járdem beriwge, olardı qollap-quwatlawı hám jaslar ushın aydın keleshek jaratatuǵınına isenim payda etiw bolıp tabıladı, -dedi Saida Mirziyoeva.
Jańa strategiya Qaraqalpaqstan Respublikasınıń ekonomikalıq potencialın júzege shıǵarıw, investiciyalıq ortalıqtı jaqsılaw, bántlik dárejesin arttırıw, kishi hám orta biznesti rawajlandırıw, sonday-aq, bilimlendiriw hám densawlıqtı saqlaw tarawlarında sapalı ózgerislerdi ámelge asırıwdı óz ishine aladı.
Bul strategiya tek ǵana ekonomikalıq kórsetkishlerge emes, al insan kapitalın rawajlandırıw, jaslardıń potencialın júzege shıǵarıw hám sociallıq teńlikti támiyinlewge de qaratılǵan. Usı kózqarastan qaraǵanda, Qaraqalpaqstan ushın bul hújjet tek ǵana aymaqlıq rawajlanıw rejesi emes, al keń kólemli rawajlanıw koncepciyası bolıp esaplanadı.

Qaraqalpaqstan xabar agentligi