Mámleketimiz mektepke shekemgi hám mektep bilimlendiriwi ministri Hilola Umarova elimizde sapar menen bolıp turǵan Polsha Respublikası bilimlendiriw ministri Barbara Novskaya menen ushırastı.

Sóylesiw waqtında STEM (ilim, texnologiya, injenerlik, matematika) baǵdarı, bilimlendiriwde sanlastırıw hám málimleme texnologiyaları, birgeliktegi bilimlendiriw joybarları, oqıwshılardı kásipke úyretiw, pedagogikalıq joqarı bilimlendiriw mákemeleri menen birge islesiw sıyaqlı máseleler dodalandı.
Ushırasıwda “Perspektywy Women in Tech” bilimlendiriw qorı Bianka Sivinska húrmetli miyman sıpatında qatnastı.
Sóylesiw dawamında gender teńlikti bekkemlew, tarawda hayal-qızlar jetekshiliginiń potencialın arttırıwǵa qaratılǵan xalıqaralıq baslamalar, atap aytqanda, global “TechWomen” tarmaǵı imkaniyatınan birgelikte paydalanıwǵa kelisip alındı.
– Ózbekstan regiondaǵı tiykarǵı birge islesiwshimiz, – dedi Barbara Novskaya. – Bilimlendiriw de ekonomikanıń bir bólegi esaplanadı. Respublika joqarı bilimlendiriw mákemelerinde pedagogika baǵdarı boyınsha alıp barılıp atırǵan reformalar biz ushın oǵada qızıq.
Polsha menen mektepke shekemgi hám mektep bilimlendiriwi tarawındaǵı sheriklik birinshi márte jolǵa qoyılǵanın atap ótiw zárúr.

M. Pirmatova, ÓzA