Mámleketimiz basshısınıń densawlıqtı saqlaw sistemasına tiyisli párman hám qararlarında belgilep berilgen tapsırmalardıń orınlanıwın támiyinlew maqsetinde, Shımbay rayonında alıp barılıp atırǵan jumıslar boyınsha Qaraqalpaqstan Respublikası Ministrler Keńesiniń Baslıǵı F.Ermanovtıń rayonda taraw wákilleri hám tiyisli shólkem hám mákeme basshıları menen ushırasıwı bolıp ótti.

Ózbekstan Respublikası Prezidentiniń basshılıǵında 2025-jıl 7-may kúni ótkerilgen májiliste belgilengen tapsırmalar hám “Respublikada densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı izbe-iz dawam ettiriw ilajları haqqında”ǵı pármanınıń orınlanıwın támiyinlew maqsetinde tájiriybe-sınaq joybarı sheńberinde rayonlıq hám qalalıq medicina birlespeleri negizinde jańa rayon (qala) lıq densawlıqtı saqlaw bólimleri shólkemlestiriledi. Álbette, jańadan shólkemlestirilip atırǵan bul strukturalar aymaqlarda medicinalıq xızmet kórsetiwdiń sapasın arttırıw, sistemalı basqarıwdı jolǵa qoyıw hám xalıqtıń talabına muwapıq xızmet kórsetiw imkaniyatın jaratadı. Qaraqalpaqstan Respublikasında tájiriybe-sınaq joybarı sheńberinde Shımbay rayonlıq medicina birlespesi belgilengen.
Bul baǵdarda Ózbekstan Respublikası Prezidentiniń 2025-jıl 19-maydaǵı “Respublikada densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı izbe-iz dawam ettiriw ilajları haqqında”ǵı PP-88-sanlı Pármanı hám “Densawlıqtı saqlaw sistemasındaǵı reformalardı ámelge asırıwdıń qosımsha ilajları haqqında”ǵı PP-185-sanlı qararı qabıl etilip, orınlanıwı boyınsha jumıslar baslap jiberildi.
Sonıń ishinde, usı jılı medicina tarawın rawajlandırıw baǵdarındaǵı tiykarǵı wazıypalar sheńberinde ayrıqsha “Jol kartası” tastıyıqlanıp, orınlanıwı qadaǵalawǵa alındı. Bunıń ushın, óz aldına arnawlı shtab shólkemlestirilip, Shımbay rayonındaǵı hár bir shańaraqlıq poliklinikadaǵı shıpakerlerdiń jumısın durıs jolǵa qoyıw hám xalıqqa baslanǵısh medicinalıq xızmetlerdiń sapalı alıp barılıwın shólkemlestiriw baǵdarında jumıslar ámelge asırılmaqta. Bunnan tısqarı, húrmetli Prezidentimizdiń qararları tiykarında tájiriybe-sınaq joybarın ámelge asırıw, onıń orınlanıwı ústinen turaqlı monitoring hám tallaw ótkerip barıw, sonday-aq, tájiriybe-sınaq joybarın respublikanıń barlıq aymaqlarına keńnen engiziw maqsetinde Shımbay rayonlıq medicina birlespesi negizinde biyǵárez yuridikalıq tárep statusına iye bolǵan rayonlıq densawlıqtı saqlaw bólimi shólkemlestirildi.
Usılar menen bir qatarda, ushırasıwda juwapkerler tárepinen Prezidentimizdiń usı párman hám qararlarınıń orınlanıwı hám ámelge asırılıp atırǵan jumıslar boyınsha maǵlıwmatlar berip ótildi.

Adilbay Orazov,
Qaraqalpaqstan xabar agentligi sholıwshısı