Múnásibet

Tashkent xalıqaralıq investiciyalıq forumı usı jıldıń eń áhmiyetli ekonomikalıq ilajlarınan biri sıpatında joqarı áhmiyetke iye boldı. Onda tek ǵana Ózbekstan emes, al xalıqaralıq jámiyetshilik ushın da áhmiyetli bolǵan máseleler dodalandı. Forumnıń tiykarǵı maqseti – Ózbekstannıń investiciyalıq tartımlılıǵın arttırıw, sırt el investorları menen birge islesiwdi kúsheytiw hám strategiyalıq reformalardı xalıqaralıq maydanda tanıtıwdan ibarat boldı.

Mámleketimiz basshısı Shavkat Mirziyoevtiń Tashkent xalıqaralıq investiciyalıq forumındaǵı shıǵıp sóylegen sózi Ózbekstannıń ashıq-aydınlıq siyasatına, innovaciyalar hám xalıqaralıq birge islesiwge sadıqlıǵın ayqın kórsetti. Onda dúnya kólemindegi siyasiy hám ekonomikalıq ózgerisler fonında Ózbekstannıń strategiyalıq kózqarasları, atap aytqanda, sanlı texnologiyalar, jasalma intellekt hám IT eksportı sıyaqlı tarawlardaǵı jetiskenlikleri hám maqsetleri haqqında keń maǵlıwmatlar berildi. Bárinen burın, forumǵa 100 ge shamalas mámleketten 3 mıńǵa shamalas sırt el miymanlarınıń qatnasıwı Ózbekstannıń global maydandaǵı abırayı artıp atırǵanınan dárek beredi. Mámleketimizge bolǵan isenimniń kúsheygeni – ekonomikalıq reformalardıń nátiyjesi hám turaqlı siyasiy ortalıqtıń nátiyjesi bolıp esaplanadı.
Prezidentimiz tárepinen keltirilgen sanlar – IT eksportınıń 1 milliard dollarǵa jetiwi, 2030-jılǵa barıp bul kórsetkishti bes esege arttırıw rejesi, 500 megavattlı 20 “data oray”dıń qurılısı – bul mámlekettiń sanlı transformaciya jolında isenimli háreket etip atırǵanın kórsetedi. Ásirese, “Bir million jasalma intellekt jetekshileri” joybarı jas áwladtı jańa texnologiyalar tiykarında tayarlawǵa qaratılǵan uzaq múddetli strategiyalıq kózqaras bolıp tabıladı. Forum sheńberindegi sessiyada Prezident járdemshisi Saida Mirziyoeva da “Boston Consulting Group” kompaniyası menen birgelikte Qaraqalpaqstandı 2035-jılǵa shekem rawajlandırıw boyınsha uzaq múddetli strategiya islep shıǵılǵanın málim etti.
Prezident járdemshisi Saida Mirziyoeva óz sózinde Qaraqalpaqstannıń keleshegi milliy tiykarǵı wazıypalardan biri ekenin atap ótti hám bul tek ǵana rejeler dúziw emes, al anıq háreketlerdi ámelge asırıw boyınsha jumıs alıp barılıp atırǵanına itibar qarattı. Sonday-aq, Qaraqalpaqstanda kóplegen mashqalalar bar ekenligi, ásirese densawlıqtı saqlaw, qorshaǵan ortalıqtı qorǵaw hám bilimlendiriw tarawında óz sheshimin kútip turǵan máseleler bar ekenligi hám sonıń menen birge oǵada úlken imkaniyatlar da bar ekenligin atap ótti.
Klimat sharayatı awır bolıwına qaramastan, ózinde tákirarlanbas tábiyǵıy gózzallıq hám turizm ushın haqıyqıy imkaniyatlardı jámlegenin, regionda bar imkaniyatlar kólemin tereńirek ańlaw ushın investorlar kelip, Qaraqalpaqstannıń úlken potencialın óz kózleri menen kóriwge hám bul imkaniyatlardıń gúwası bolıwǵa jáne bul imkaniyatlar kólemin bahalawǵa mirát etetuǵının aytıp ótti.
Maqsetimiz tek ǵana investiciya alıp keliw emes, al kirgizilgen investiciya jergilikli xalıqqa járdem beriwi, isbilermenlerdi qollap-quwatlawı hám jaslar ushın aydın keleshek jaratıwǵa isenim payda etiwi bolıp esaplanadı,-dedi Prezident járdemshisi Saida Mirziyoeva. Maǵlıwmat ushın, Tashkent xalıqaralıq investiciya forumı tórtinshi márte ótkerilmekte. Forum birinshi márte 2022-jıl 24-26-mart kúnleri, ekinshi márte 2023-jıl 27-28-aprel kúnleri hám úshinshi márte 2024-jıl 2-3-may kúnleri bolıp ótken. Bul forum Ózbekstannıń jańa ekonomikalıq kelbetin kórsetiwshi áhmiyetli platforma sıpatında tariyxta qaldı. Onıń nátiyjesi tek ǵana qol qoyılǵan shártnamalarda emes, al olardıń ámeliy orınlanıwı hám mámlekettiń investiciyalıq ortalıǵın túp-tiykarınan jaqsılawda kórinedi. Forum – tek ǵana ilaj emes, al jańa basqıshqa ótiw belgisi bolıp esaplanadı.
Bul retki forum biznes ortalıǵı jáhán standartlarına beyimlesip atırǵanın kórsetedi – hám investorlarǵa isenim mehrin arttıradı. Bıyılǵı forumda ekonomikalıq rawajlanıw, investiciyalar, jasıl energiya, sanlı texnologiyalar yamasa qáwipsizlik sıyaqlı áhmiyetli temalar dodalandı. Bul temalar global jámiyetshilik ushın áhmiyetli, sonıń menen birge, Ózbekstan ushın da strategiyalıq áhmiyetke iye. Forumda túrli mámleketlerden kelgen delegaciyalar qatnastı, jańa shártnamalar, memorandumlarǵa qol qoyıldı.
Bul Ózbekstan ekonomikası ushın jańa imkaniyatlar esigin ashadı.
Forum Ózbekstannıń xalıqaralıq birge islesiwge tayar ekenin, investiciyalar ushın ashıq ekenin hám reformalardı tereńlestiriwdegi isenimliligin kórsetti. Juwmaqlap aytqanda, Mámleketimiz basshısınıń bul shıǵıp sóylegen sózi Ózbekstannıń global investiciyalıq ortalıqtaǵı ornın, innovaciyalardı alǵa qoyıwdaǵı isenimliligi hám xalıqaralıq birge islesiwdegi ashıq-aydınlıǵın kórsetti. Bul tek ǵana investorlarǵa emes, al mámleketimiz ishindegi reformalardıń nátiyjeliligine de jańa túrtki beredi desek, asıra aytqan bolmaymız.

Gúljan Xalmuratova,
Oliy Majlis Nızamshılıq palatasınıń deputatı,
ÓzLiDeP frakciyası aǵzası.

Qaraqalpaqstan xabar agentligi