Qaraqalpaqstan Respublikası Ministrler Keńesiniń Baslıǵı Farhod Ermanov elimizdiń Singapurdaǵı ayrıqsha hám tolıq huqıqlı elshisi Alisher Qayumov, Indoneziya mámleketindegi ayrıqsha hám tolıq huqıqlı elshisi Oybek Eshonov, Yaponiyadaǵı ayrıqsha hám tolıq huqıqlı elshisi Muxsinxoja Abduraxmonov hám Qubla Koreyadaǵı ayrıqsha hám tolıq huqıqlı elshisi Alisher Abdusalomov penen ushırastı.

Eń dáslep Ministrler Keńesiniń Baslıǵı F.Ermanov elshilerdi respublikamızǵa saparı menen qızǵın qutlıqlap, húrmetli Prezidentimizdiń baslaması menen sırt mámleketlerdegi Ózbekstan Respublikasınıń diplomatiyalıq wákilxanaları basshıları menen usınday áhmiyetli ushırasıwlardıń orınlarda ótkeriliwi, aymaqlar ekonomikasınıń turaqlı rawajlanıwına jáne de keń imkaniyat jaratatuǵının ayrıqsha atap ótti.
Haqıyqatında da, mámleketimizde sońǵı jıllarda alıp barılıp atırǵan keń kólemli reformalar nátiyjesinde aymaqlarda investiciyalıq ortalıqtı jaqsılaw, sırt el investorları ushın qolaylı sharayatlar jaratıw baǵdarında orınlarda ámeliy ilajlar alıp barılmaqta. Bunnan tısqarı, xalıqaralıq grantlar hám sırtqı biyǵárez qarjılardı tartıwǵa ayrıqsha itibar qaratılmaqta.
Sonday-aq, ushırasıw dawamında Ministrler Keńesiniń Baslıǵı tárepinen Húrmetli Prezidentimizdiń Qaraqalpaqstanǵa bolǵan ayrıqsha itibarı nátiyjesinde isbilermenlerge, ásirese sırt elli investorlarǵa keń jollar ashıp berilip, olarǵa bir qatar jeńillikler hám barlıq sharayatlar jaratılıp atırǵanlıǵı boyınsha maǵlıwmatlar berip ótti.
Óz gezeginde ótkerilgen ushırasıwda mámleketimizdiń sırt mámleketlerdegi elshileri shın júrekten qabıllaǵanı ushın minnetdarshılıq bildirip, keleshekte Aralboyı regionın bunnan bılay da rawajlandırıw, sırt mámleketler menen birgeliktegi joybarlardı ámelge asırıw, investorlardı tartıw boyınsha óz pikir-usınısların bildirdi.

Qaraqalpaqstan xabar agentligi