Elimizdiń barlıq aymaqlarında bolǵanı sıyaqlı, Taxtakópir rayonında da Ózbekstan Respublikasınıń «Puqaralar jıyını baslıǵın saylaw haqqında»ǵı nızamı tiykarında puqaralar jıyını baslıqlarınıń saylawı shólkemleskenlik penen bolıp ótti.

Taxtakópir rayonı hákimliginiń májilisler zalında usı ótkerilgen saylawlarda saylanǵan 17 puqaralar jıyınları baslıqlarına rásmiy túrde xızmet gúwalıǵı hám kókirek belgisin tapsırıw máresimi bolıp ótti.
Ilajda rayon hákimi J. Adilov jańadan saylanǵan puqaralar jıyını baslıqların qutlıqlap, olarǵa óz wazıypaların pidayılıq penen atqarıw, xalıqtıń mashqalaların úyrenip, olardı nátiyjeli sheshiwdegi islerine tabıslar tiledi.
Máresimde jıyın basshılarına rásmiy gúwalıqlar hám kókirek belgileri saltanatlı túrde tapsırıldı.
Sonday-aq, ilajda aymaqtıń sociallıq-ekonomikalıq rawajlanıwına hám xalıqtıń turmıs dárejesin arttırıwǵa múnásip úles qosıp kiyatırǵan bir qatar taraw pidayıları Ózbekstan máhálleleri assosaciyası Taxtakópir rayonlıq bóliminiń Húrmet jarlıǵı menen sıylıqlandı.

Adilbay Orazov,
Qaraqalpaqstan xabar agentligi sholıwshısı.