Berdaq atındaǵı Qaraqalpaq mámleketlik universiteti akademiyalıq liceyinde 2024-2025-oqıw jılı pitkeriwshileri ushın saltanatlı diplom tapsırıw máresimi bolıp ótti.

Ilajǵa universitet basshıları liceydiń pedagogikalıq jámááti, pitkeriwshi oqıwshılardıń ata-anaları hám keń jámiyetshilik wákilleri qatnastı.
Saltanatlı máresimde Berdaq atındaǵı Qaraqalpaq mámleketlik universiteti rektorı, akademik A.Reymov barlıq pitkeriwshilerdi, olardıń ata-anaları hám ustazların oqıwshılardı liceydi tabıslı tamamlaǵanı menen qutlıqladı. Ol óziniń shıǵıp sóylegen sózinde Prezidentimizdiń basshılıǵında mámleketimizde jaslarǵa ayrıqsha itibar qaratılıp, olardıń zamanagóy bilim hám kásip-óner iyelewi ushın barlıq sharayatlar jaratılıp atırǵanın atap ótip, jaslardı keleshekte Watanımızdıń rawajlanıwına múnásip úles qosatuǵın jetik qánigeler bolıp jetilisiwine isenim bildirip, aldaǵı islerinde tabıslar tiledi.
Bunnan soń pitkeriwshi oqıwshılarǵa saltanatlı túrde diplomlar tapsırılıp, oqıw dawamında óziniń úlgili minez-qulqı, belsendiligi hám jetiskenlikleri menen ajıralıp turǵan pitkeriwshilerge Húrmet jarlıqları, altın hám gúmis medallar tapsırıldı.
-Bıyılǵı jılı liceyimizdi anıq, tábiyǵıy, shet tiller hám social-gumanitar pánler baǵdarları boyınsha 248 oqıwshı pitkerip shıqpaqta,- deydi usı licey direktorınıń oqıw isleri boyınsha orınbasarı Ruslan Najimov.-Olardıń arasınan 2 oqıwshımız altın, 7 oqıwshımız gúmis medallar menen pitkergen bolsa, 48 oqıwshı «Qızıl diplom» menen tamamladı. Álbette, pitkeriwshilerimizdiń bul jetiskenlikleri tek ǵana oqıwshılar ushın emes, al, olardıń ata-anaları hám ustazları ushın da úlken maqtanısh bolıp esaplanadı. Aldaǵı waqıtları usı pitkeriwshilerimizdiń barlıǵı da ózleri qálegen oqıw orınlarına kirip ketip, elimiz ushın kerekli qánigeler bolıp jetilisedi, dep oylayman.
Ilaj dawamında pitkeriwshi oqıwshılar, olardıń ata-anaları da shıǵıp sóylep, ózlerine kórsetilip atırǵan joqarı húrmet, bildirilgen jaqsı tilek hám isenim ushın bilim bergen ustazlarǵa minnetdarshılıqların bildirdi.

Adilbay Orazov,
Qaraqalpaqstan xabar agentligi sholıwshısı