Ózbekstan Respublikası Prezidenti Shavkat Mirziyoev 11-iyun kúni Sırt el investorları keńesiniń úshinshi májilisi sheńberinde bir qatar abıraylı shólkemlerdiń basshıları basshılıǵındaǵı delegaciya wákillerin qabıl etti.

Evropa tikleniw hám rawajlanıw bankiniń prezidenti Odil Reno-Basso basshılıǵındaǵı delegaciya menen ushırasıwda Ózbekstan usı abıraylı xalıqaralıq qarjı institutı arasındaǵı strategiyalıq birge islesiwdi jáne de keńeytiw máseleleri kórip shıǵıldı.
Birgeliktegi joybarlar portfeli keńeyip atırǵanı qanaatlanıwshılıq penen atap ótildi: ETRBnıń Ózbekstanǵa investiciyaları 5,5 milliard evrodan astı. Usı jılı jáne 1,1 milliard evro tartıw rejelestirilgen bolıp, onıń úlken bólegi jeke menshik sektordı qollap-quwatlawǵa baǵdarlanadı.
Sheriklik strategiyası nátiyjeli ámelge asırılmaqta. ETRBnıń jedel járdemi menen bank tarawı transformaciyalanbaqta.
Mámleketimiz basshısı birge islesiw nátiyjeliligin arttırıw áhmiyetli ekenin atap ótip, onıń tiykarǵı baǵdarların kórsetip ótti.
Suw támiynatı sistemasın texnologiyalıq jaqtan modernizaciyalaw, energiya nátiyjeliligin arttırıw baǵdarlamasın alǵa qoyıw, ipoteka bazarın, erkin ekonomikalıq zonalar infrastrukturasın rawajlandırıw, kishi hám orta biznes imkaniyatların keńeytiw, hayal-qızlar isbilermenligin qollap-quwatlaw sıyaqlı baǵdarlar usılardıń qatarına kiredi.
Bilimlendiriw hám medicina tarawlarında mámleketlik-jeke menshik sheriklik joybarların alǵa qoyıw, jasalma intellektti engiziw hám sanlı transformaciyaǵa qaratılǵan startaplardı qollap-quwatlawǵa ayrıqsha itibar qaratıldı.
Lombardiya Italiyanıń xalıq sanı eń kóp hám iri aymaqlarınan biri bolıp, Evropanıń ekonomikalıq jaqtan eń rawajlangan wálayatları qatarına kiredi.
Lombardiya wálayatınıń gubernatorı Attilio Fontana basshılıǵındaǵı delegaciya menen ushırasıwda óz-ara paydalı birge islesiwdi, bárinen burın, sawda-ekonomikalıq hám investiciyalıq sheriklikti rawajlandırıwdıń ámeliy jaqları dodalandı.
Jaqında Samarqand qalasında Bas ministr Jorja Meloni menen bolıp ótken sóylesiwlerdiń nátiyjeleri, solar dawamında aymaqlararalıq baylanıslardı qollap-quwatlawǵa kelisip alınǵanı úlken qanaatlanıwshılıq penen atap ótildi.
Búgingi kúnde elimizde Lombardiya kompaniyaları menen birgelikte pomidor, shafran jetistiriw, toqıma emes gezleme hám trikotaj, azıq-awqat ónimlerin islep shıǵarıw boyınsha joybarlar tabıslı ámelge asırılmaqta. Tayar tekstil, avtoelektronika, qurılıs materialların islep shıǵarıw, sút hám miywe-ovoщ ónimlerin qayta islew, jámiyetlik transporttı rawajlandırıw hám basqa da joybarlar islep shıǵılmaqta.
Birgeliktegi joybarlar portfelin keńeytiw, Italiyanıń aldınǵı texnologiyaları hám investiciyaların Ózbekstan ekonomikasınıń túrli tarmaqlarına jáne de keńnen tartıw áhmiyetli ekenligi atap ótildi.
Milan qalasında Ózbekstannıń sanaat hám eksport potencialı kórgizbesin ótkeriw, sawda úyin ashıw hám “Uzbek Organic” brendi astında eksport liniyasın iske qosıwǵa kelisip alındı.
Mádeniy-gumanitarlıq almasıwdı keńeytiw maqsetinde 2026-jılı Milanda Ózbekstan muzeyleriniń kórgizbesin shólkemlestiriw máselesi úyrenilmekte.
Gubernator óziniń shıǵıp sóylegen sózinde, Lombardiya isbilermen toparlarınıń joybar hám baslamaları hár tárepleme qollap-quwatlanıp atırǵanı ushın Prezidentimizge qızǵın minnetdarshılıq bildirdi. Ózbekstan aymaqları menen keń kólemli sheriklikti jolǵa qoyıwǵa hár tárepleme járdem beriwge tayar ekenligin tastıyıqladı.
Ushırasıw juwmaǵında mámleketiiiz basshısı Attilio Fontanaǵa 2026-jılı Milan qalasında bolıp ótetuǵın qısqı Olimpiadaǵa tayarlıq kóriw ushın hám onı ótkeriwde tabıslar tiledi.
Birlesken Arab Ámirlikleri energetika hám infrastruktura ministri Suhayl al-Mazruiy basshılıǵındaǵı delegaciya menen ushırasıwda «Amea Power», «Etihad Water & Electricity», «TAQA Water Solutions», «AD Ports» hám «Masdar» kompaniyalarınıń basshıları da qatnastı.
Ushırasıw aldında ministr mámleketimiz basshısına BAÁ Prezidenti Shayx Muhammad Ol Nahayan, Bas ministri, Dubay ámiri Shayx Muhammad Ol Maktum, Vice-prezidenti Shayx Mansur Ol Nahayan hám Abu-Dabi Ámirliginiń miyrasxorı Shayx Xolid Ol Nahayannıń sálemi hám eń jaqsı tileklerin jetkerdi.
Ózbekstan Prezidentiniń usı jılı yanvar ayındaǵı BAÁǵa saparı juwmaǵında erisilgen kelisimlerdi ámelge asırıw máseleleri kórip shıǵıldı.
Ózbekstan-BAÁ strategiyalıq sheriklik qatnasıqları jedel rawajlanıp atırǵanı úlken qanaatlanıwshılıq penen atap ótildi. Tovar almasıw hám investiciyalar kólemi, birgeliktegi kárxanalar hám tikkeley aviaqatnawlardıń sanı artpaqta.
Ámirliklerdiń jetekshi kompaniyalarınıń qatnasıwındaǵı joybarlar portfeli 20 milliard dollardan arttı. Tórtinshi Tashkent investiciyalıq forumı sheńberinde BAÁ kompaniyaları menen bir qatar jańa kelisimlerge qol qoyıldı.
Energetika, transport, logistika, awıl xojalıǵı, densawlıqtı saqlaw, bilimlendiriw, qala qurılısı, suw támiynatı hám basqa da baǵdarlardaǵı iri joybarlardı jedellestiriwge kelisip alındı.
Ózbekstan-Saudiya Isbilermenler keńesiniń járdemshi baslıǵı, “ACWA Power” kompaniyasınıń basqarma baslıǵı Muhammad Abunayyan basshılıǵındaǵı iri kompaniyalardıń delegaciyası menen ushırasıwda “Vision Invest” hám “Riyadh Cables” kompaniyalarınıń basshıları da qatnastı.
Bul mámlekettiń isbilermenleri menen ámeliy birge islesiwdi jáne de keńeytiw hám elimizdegi tiykarǵı joybarlardı jedellestiriw máseleleri kórip shıǵıldı.
Saudiyanıń “ACWA Power” hám basqa da kompaniyaları menen nátiyjeli sheriklik jolǵa qoyılǵanı qanaatlanıwshılıq penen atap ótildi.
Búgingi kúnde birgeliktegi joybarlar portfeli 24 milliard dollarǵa jetken. “Jasıl” energetika tarawındaǵı joybarlar tabıslı ámelge asırılmaqta. Tashkent wálayatında “jasıl” vodorod islep shıǵarıw jolǵa qoyıldı.
Elektr tarmaqların modernizaciyalaw, elektrotexnika sanaatın rawajlandırıw, málimleme texnologiyaları, transport, kommunallıq xojalıq hám basqa da baǵdarlardaǵı joybarlardı alǵa qoyıw áhmiyetli ekenligi atap ótildi.
Mámleketimiz basshısı Qıtaydıń «China State Construction», «China General Nuclear Power», «CAMCE», «Goldwind» hám «ZTO Express» kompaniyalarınıń basshıları menen ushırasıwda Qıtay biznesiniń Ózbekstanǵa qızıǵıwshılıǵı hár qashanǵıday joqarı ekenini qanatlanıwshılıq penen atap ótti. Ótken jıldıń ózinde bul mámleketten tartılǵan investiciyalardıń kólemi 10 milliard dollardan arttı.
«China State Construction» kompaniyası direktorlar keńesiniń baslıǵı CHjen Syuesyuan menen sáwbette Tashkent qalasında jol infrastrukturasın modernizaciyalaw baǵdarındaǵı birge islesiw nátiyjeleri joqarı bahalandı. Tashkent qalasında mádeniyat obektlerin shólkemlestiriw boyınsha perspektivalı rejeler dodalandı.
Tashkent wálayatında sanaat zonasın qurıw joybarın baslaw hám kompaniyanıń avtomobil jolları qurılısında qatnasıwı haqqında kelisip alındı.
«China General Nuclear Power» korporaciyasınıń baslıǵı Yan CHanli menen sóylesiwlerde taw-kán sanaatında sheriklikti bekkemlew máseleleri dıqqat orayında boldı. Geologiya-izlew jumısların jedellestiriw hám jańa kánlerdi ózlestiriwge qızıǵıwshılıq bildirildi. Kompaniyanıń gibrid quyash elektr stanciyasın qurıw hám bajıxana júklerin skanerlew texnologiyaların engiziw rejeleri qollap-quwatlandı.
«CAMCE» korporaciyasınıń baslıǵı Van Bo menen paytaxtımızda Olimpiada qalashasın qurıw boyınsha birgelikte ámelge asırılǵan jumıslar juwmaqlandı. Kompaniya basqarıwında Tashkent qalasındaǵı «Jańa áwlad» industriallıq texnoparki jedel rawajlanıp atırǵanı atap ótildi.
Birgeliktegi baslamalar portfelin keńeytiw, atap aytqanda, elektr energetikası hám Jańa Tashkent qalasın infrastrukturalıq rawajlandırıw joybarların jedellestiriwge ayrıqsha itibar qaratıldı.
«Goldwind» kompaniyasınıń baslıǵı Vu Gang penen kompaniyanıń «jasıl» energetikanı rawajlandırıwdaǵı qatnası boyınsha pikir alısıldı. Ózbekstanda kompaniya menen birgelikte samal elektr stanciyaları ushın komplektlewshi bólekler islep shıǵarıw jolǵa qoyılǵan.
Samal generatorların islep shıǵarıwdı lokalizaciyalaw hám aǵımdaǵı joybarlardı jedellestiriwge kelisip alındı.
«ZTO Express» kompaniyasınıń basshısı Xu Syanlyan mámleketimiz basshısına Ózbekstanda tovarlardı bajıxana rásmiylestiriwinen ótkeriwge járdemlesiw boyınsha onlayn platformanı iske qosıw hám «aqıllı» logistika qoymaxanaların shólkemlestiriw niyeti haqqında maǵlıwmat berdi.
Oman Patshalıǵı sawda, sanaat hám investiciyalarǵa járdem beriw ministri Qays bin Muhammad al-Yusuf penen ushırasıw aldında joqarı mártebeli miyman mámleketimiz basshısına Oman Sultanı Haysam bin Toriq Ol Saidtıń qızǵın sálemin jetkerdi.
Ámeliy birge islesiwdi, bárinen burın, sawda-ekonomikalıq hám investiciya tarawlarında keńeytiw máseleleri kórip shıǵıldı.
Túrli dárejelerdegi jedel sóylesiwler qanaatlanıwshılıq penen atap ótildi. Forum sheńberinde Húkimetleraralıq komissiyanıń gezektegi májilisi hám isbilermen toparlarınıń ushırasıwları bolıp ótedi.
Energetika, geologiya, azıq-awqat, toqımashılıq, ximiya sanaatı, transport hám logistika, turizm, qarjı tarawlarında birgeliktegi joybarlardı, sonıń ishinde, Ózbekstan – Oman investiciya kompaniyasınıń jedel járdeminde alǵa qoyıw áhmiyetli ekenligi atap ótildi.
Evropada qáwipsizlik hám birge islesiw shólkeminiń ámeldegi baslıǵı, Finlyandiya sırtqı isler ministri Elina Valtonen menen sóylesiw aldında joqarı mártebeli miyman mámleketimiz basshısına Finlyandiya Prezidenti Aleksandr Stubbtiń sálemi hám eń jaqsı tileklerin jetkerdi.
Ózbekstan menen EQBSh arasında ámeliy qatnasıqlardı bekkemlew hám Ózbekstan-Finlyandiya birge islesiwin jáne de keńeytiw máseleleri dodalandı.
Milliy saylaw sistemasın mojernizaciyalaw, ǵalaba xabar qurallarınıń erkinligin támiyinlew, gender hám jaslar máseleleri, «jasıl» kún tártibi boyınsha shólkem menen konstruktivlik birge islesiw rawajlanıp baratırǵanın qanaatlanıwshılıq atap ótildi. Klimat qáwipsizligi hám turaqlı rawjalanıw máselelerine itibardı kúsheytiw áhmiyetli ekenligi atap ótildi.
Ózbekstan – Finlyandiya qatnasıqlarınıń, bárinen burın, sawda-ekonomikalıq investiciyalıq hám mádeniy-gumanitarlıq tarawlardaǵı kún tártibi tolıq kórip shıǵıldı.
Regionallıq máseleler boyınsha da pikir alısıldı, bolajaq ilajlardıń rejesi kórip shıǵıldı.
Awǵanstan sanaat hám sawda ministri wazıypasın atqarıwshı Nuriddin Aziziy menen sóylesiw aldında joqarı mártebeli miyman Ózbekstan jetekshisine Awǵanstan basshılıǵınıń qızǵın sálemin jetkerdi.
Sawda-ekonomikalıq, transport-logistika, energetika hám agrar tarawlarda, sonday-aq, geologiya-izlew hám paydalı qazılmalar baǵdarındaǵı óz-ara paydalı birge islesiwdi bunnan bılay da keńeytiw máseleleri kórip shıǵıldı.
Isbilermenlik baylanıslarınıń jedelleskeni qanaatlanıwshılıq penen atap ótildi. Óz-ara tovar almasıw kólemi, birgeliktegi kárxanalardıń sanı artpaqta, eki mámleket kompaniyalarınıń qatnasıwında biznes saparları hám kórgizbeler turaqlı ótkerilmekte. Termiz qalasında Xalıqaralıq sawda orayı tabıslı jumıs alıp barmaqta. Usı jıldıń may ayında Qabul hám Mozori Sharif qalalarında sawda úyleri ashıldı.
Ózbekstan basshısı ekonomikalıq hám investiciyalıq birge islesiwdiń shártnamalıq-huqıqıy tiykarların bunnan bılay da bekkemlew zárúr ekenligin atap ótti.
Sonday-aq, “Hayraton” sanaat orayın tez pursatta qurıw, ol jerde farmacevtika, mebel qurılısı, toqımashılıq ónimlerin, qurılıs materialların islep shıǵarıw, awıl xojalıǵı ónimlerin qayta islew quwatlıqların jaylastırıw zárúr ekenligi atap ótildi.
Transawǵan temir jolı hám “Surxon – Puli-Xumri” elektr uzatıw liniyasın qurıw sıyaqlı iri regionallıq infrastruktura joybarları qollap-quwatlandı.
Yaponiya xalıqaralıq birge islesiw banki (JBIC) basqarıwshısı Nobumicu Xayasi basshılıǵındaǵı delegaciya menen ushırasıwda Yaponiyanıń bul jetekshi qarjı institutınıń qatnasıwındaǵı ámeliy birge islesiwdi keńeytiw hám birgeliktegi joybarlardı alǵa qoyıw máseleleri kórip shıǵıldı.
JBIC mámleketimiz ekonomikasınıń áhmiyetli tarmaqların rawajlandırıw hám modernizaciyalawǵa úles qosıp atırǵanı qanaatlanıwshılıq penen atap ótildi.
Búgingi kúnde birgeliktegi joybarlar portfeli, sonıń ishinde, neft-ximiya, toqımashılıq sanaatı, energetika, málimleme texnologiyaları, infrastruktura hám basqa da baǵdarlarda derlik 4 milliard dollarǵa jetti.
Jańa úsh jıllıq birge islesiw baǵdarlaması sheńberinde Yaponiya kompaniyalarınıń qatnasıwında “jasıl” energetika, IT, transport hám densawlıqtı saqlaw tarawlarında kooperaciya joybarların tez pursatta tayarlaw hám alǵa qoyıw áhmiyetli ekeni atap ótildi.
Ózbekstanda Yaponiya xalıqaralıq universitetin ashıw boyınsha ámeliy ilajlar kóriw áhmiyetli ekenligi atap ótildi.
Sóylesiwler juwmaǵında kompleksli “jol kartası”n qabıl etiwge kelisip alındı.
Ózbekstan Respublikası Prezidenti Shavkat Mirziyoev “Standard Chartered”, “International Hospitals Group”, “LVMH”, “Airbus” sıyaqlı Evropanıń bir qatar jetekshi kompaniyalarınıń basshıların da qabılladı.
Mámleketimiz basshısı forumda Evropa mámleketlerinen qatnasıwshılar sanınıń kóbeygeni tárepler ekonomikalıq hám investiciyalıq birge islesiwdi keńeytiwden mápdar ekeninen dárek beretuǵının atap ótti.
Evropa mámleketleri menen tovar almasıw kólemi, birgeliktegi kárxanalar sanı hám investiciyalar portfeli kóbeyip atırǵanı qanaatlanıwshılıq penen atap ótildi. Jedel mádeniy-gumanitarlıq, bilimlendiriw hám turizm almasıwları jolǵa qoyılǵan.
“Standard Chartered” kompaniyasınıń basshısı Saif Malik penen kishi biznes hám infrastruktura joybarların qarjılandırıw, sonday-aq, Ózbekstan bankleri tárepinen jańa kredit liniyaların ózlestiriw boyınsha sheriklikti keńeytiw perspektivaları kórip shıǵıldı.
“International Hospitals Group” basqarmasınıń baslıǵı CHester King penen klinika qurıw rejeleri, sonday-aq, Ózbekstandaǵı kóp tarmaqlı medicina orayların mámleketlik-jeke menshik sheriklik tiykarında basqarıw máseleleri dodalandı.
Tashkent-sitide “LVMH” flagman dúkanın ashıwdı tezlestiriw áhmiyetli ekenligi atap ótildi. Sonday-aq, Ózbekstandaǵı jipek hám tábiyǵıy shiyki zat islep shıǵarıwshılardı kompaniyanıń támiynat shınjırına kirgiziw imkaniyatları kórip shıǵıldı.
“Airbus” komaniyasınıń Evropadaǵı prezidenti Yoxan Pelise menen sóylesiwde aviaciya tarawındaǵı sheriklikti keńeytiw prespektivalarına ayrıqsha itibar qaratıldı. Uzaq múddetli Birge islesiw baǵdarlamasın qabıl etiw áhmiyetli ekenligin málim etti.
Evropa kompaniyalarınıń basshıları Ózbekstan Prezidentine qızǵın qabıllaǵanı hám mámleketimizde sırt el investorları ushın jaratılǵan qolaylı sharayatlar ushın minnetdarshılıq bildirdi. Ekonomikanıń tiykarǵı tarmaqlarında áhmiyetli joybar hám baǵdarlamalardı ámelge asırıwda bunnan bılay da qatnasıwǵa tayar eknligin málim etti.
“Euronews” media xoldingi direktorlar keńesiniń baslıǵı Pedro Vargas penen ushırasıwda usı jetekshi kompaniya menen birge islesiwdi rawajlandırıw, sonıń ishinde, “Euronews”tiń keń auditoriyasın Ózbekstannıń bay mádeniy-tariyxıy miyrası, mámlekette júz berip atırǵan áhmiyetli siyasiy-ekonomikalıq processler, sonday-aq, onıń investiciyalıq hám turizm potencialı haqqında xabardar etiw máseleleri kórip shıǵıldı.
Mámleketimiz basshısı birgeliktegi málimleme joybarların ámelge asırıw hám professional kadrlar tayarlaw baǵdarındaǵı jedel háreketlerdi, sonday-aq, “Euronews” Tashkent qalasında óz ofisin ashıwdı rejelestirip atırǵanın qollap-quwatladı.
“Euronews Academy” baǵdardaması sheńberinde ózbekstanlı jurnalistlerdi aldınǵı professional standartlar tiykarında oqıtıw rejeleri qollap-quwatlandı.
Barlıq perspektivalı baǵdarlar boyınsha sistemalı jumıslardı shólkemlestiriw maqsetinde birgeliktegi “jol kartası”n tayarlawǵa kelisip alındı.

ÓzA