Ellikqala rayonında Qaraqalpaqstan Respublikası Ministrler Keńesi baslıǵınıń birinshi orınbasarı – Ekonomikalıq rawajlanıw hám kámbaǵallıqtı qısqartıw ministri N.Erlepesov hám Qaraqalpaqstan Respublikası salıq basqarmasınıń baslıǵı X.Bekchanovtıń basshılıǵında isbilermenler menen ushırasıw ótkerildi.

Onda 100 ge shamalas isbilermenler hám tiyisli shólkemlerdiń juwapkerleri qatnastı.
Júzbe-júz sóylesiwde dáslep isbilermenlerge salıq nızamshılıǵındaǵı jańalıqlar, atap aytqanda, QQS hákimshiligi, ÓXIK, sonday-aq Qaraqalpaqstan Respublikası sanaat kárxanalarında janılǵı-energiya resurslarınan únemli paydalanıw maqsetinde elektr energiyası ushın tarif 15 procent tómenletilgen muǵdarda jeńillikler berilgenligi haqqında túsinikler berildi. Soń isbilermenlerdiń múrájatları tıńlandı.
Sóylesiwde barlıq mashqala hám usınıslar tolıq úyrenilip, mashqalalardıń kópshiligi usı jerdiń ózinde sheshimin taptı. Sonıń menen birge, qosımsha úyreniw hám waqıt talap etetuǵın ayırım máselelerdiń sheshimi ushın múddet belgilendi.
Bunday ushırasıwlardıń maqseti isbilermenlerdiń mashqalaların nátiyjeli sheshiw, orınlarda óndirislik kárxanalardıń jumısınıń turaqlılıǵın támiyinlew, olardıń jumısın keńeytiw hám sol arqalı qosımsha jumıs orınların jaratıwǵa qaratılǵan.

Qaraqalpaqstan xabar agentligi