Orınlarda reje-grafik tiykarında Ózbekstan Respublikası Prezidentiniń 2024-jıl 30-dekabrdegi PQ-465-sanlı qararınıń orınlanıwın támiyinlew maqsetinde atız shetleri, kanallar, suwǵarıw hám kollektor-drenaj tarmaqlarınıń átirapındaǵı maydanlarda, xalıqtıń qıytaq jerleri, shańaraqlar hám kóp qabatlı turaq jaylar aldı jáne máhálleniń ishki kóshelerinde awıl xojalıǵı ónimlerin jetistiriwdi shólkemlestiriw máselelerine baǵıshlanǵan seminarlar ótkerilmekte.

Qanlıkól rayonında usı máselelerge baǵıshlanǵan seminar ótkerildi.
Onda Qanlıkól, Shomanay, Qońırat hám Moynaq rayonlarınan Karantin agentligi, Fermerler keńesi hám basqa da bir qatar awıl xojalıǵı tarawı wákilleri, diyqan-fermerler hám qıytaq jer iyeleri qatnastı.
Ilajda qarardıń mazmun-mánisi, belgilengen jeńillikler túsindirilip, atız shetinen hám kollektor-drenaj átiraplarınan nátiyjeli paydalanıw, egilgen miywe nállerin hám palız eginlerin tárbiyalaw boyınsha maǵlıwmatlar berildi.
Seminarda awıl xojalıǵı kooperaciyaların shólkemlestiriw hám júrgiziw, edu.karantin.uz platformasında oqıtıw arqalı xalıqtıń bántligin támiyinlew máseleleri haqqında da sóz etildi. Atap ótilgenindey, hár bir egiske jaramlı jerlerden nátiyjeli paydalanıwımız kerek.
Maǵlıwmat ushın, 2025-jılı Qanlıkól rayonında atız shetlerindegi 49 gektar maydanǵa hám suwǵarıw hám kollektor-drenaj átirapındaǵı 5 gektar maydanǵa miywe nálleri, palız eginleri, ovoщlar hám sobıqlı eginler egilgen. Bul egilgen náller aymaqlarǵa biriktirilgen fitosanitariyalıq qadaǵalaw mámleketlik inspektorları tárepinen monitoring etilip, onıń nátiyjeleri boyınsha maǵlıwmatlar “E-fito” programmasındaǵı “Atız qadaǵalawı” platformasına tolıq kirgizilip, dizimge alınǵan.
Ilajda qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi