Respublikamızdıń barlıq aymaqlarında bolǵanı sıyaqlı Taxtakópir rayonında da ǵálle orım-jıyını jumısları qızǵın baslanıp ketti.

Ótken gúzde 2025-jıldıń zúrááti ushın 83 ǵálle jetistiriwshi subektler tárepinen 3300 gektar jerge gúzlik biyday tuqımın ekken rayon diyqanları onnan 9900 tonna ónim jetistiriwdi rejelestirgen.
-Rayon aymaǵında ǵálle orım-jıyını máwsimin shólkemleskenlik penen ótkeriw maqsetinde, 15 otryad dúzilip, bul otryadlarǵa Ishki isler bólimi, Ayrıqsha jaǵdaylar bólimi hám rayon hákimliginiń juwapker xızmetkerleri biriktirilgen. Sonday-aq, otryadlar quramına 15 kombayn, 45 dán tasıwshı júk avtomashinası, 40 traktor tirkemesi, 4 kóshpeli ustaxana hám 4 janar may tasıwshı qurallar tartılǵan,-deydi rayon hákimi Jambul Adilov.-Búgingi kúnge shekem rayondaǵı bir qatar fermer xojalıqları dáslepki kúnlerde-aq, belgilengen rejeni artıǵı menen orınlap shıqpaqta.
Házirgi waqıtları rayonında ǵálle orım-jıyını qızǵın dawam etpekte.

Adilbay Orazov,
Qaraqalpaqstan xabar agentligi sholıwshısı