«Ózbekneftgaz» akcionerlik jámiyeti málimleme-kommunikaciya texnologiyaları departamenti baslıǵı Inomjon Norqulovtıń málim etiwinshe, jaqında kompaniya delegaciyası xızmet saparı menen Qazaqstannıń Astana hám Atıraw qalalarında boldı.

Sapar Baku energetika hápteliginde «Ózbekneftgaz», Ázerbayjannıń «SOCAR», Qazaqstannıń «QazMunayGaz» hám Rossiyanıń «Tatneft» kompaniyaları arasında qol qoyılǵan tórt tárepleme memorandumnıń orınlanıwı sheńberinde ámelge asırıldı.
– Sapardıń tiykarǵı maqseti neft-gaz tarawındaǵı aldınǵı sanlı sheshimler hám innovaciyalıq tájiriybeler menen tanısıw, óz-ara tájiriybe almasıw jáne milliy kompaniyalar arasındaǵı strategiyalıq birge islesiwdi bekkemlewge baylanıslı, – dedi I.Norqulov. – Biz Astana qalasındaǵı ushırasıwlar waqtında «QazMunayGaz» milliy kompaniyasında korporativ málimleme sisteması, yaǵnıy SAP ERPtiń engiziliwi hám ekspluataciya processleri menen tanıstıq. Onda SAP S/4HANA platformasına ótiw, biznes processlerin integraciyalaw, basqarıw esabın avtomatlastırıw, operaciyalıq nátiyjelilikti arttırıw hám korporativ basqarıwdıń ashıq-aydınlıǵın támiyinlew boyınsha ámelge asırılıp atırǵan ilajlar haqqında maǵlıwmat berildi.
Delegaciya Qazaqstandaǵı birinshi gaz-ximiya kompleksi-«Kazakhstan Petrochemical Industries Inc.» (KPI) zavodında da boldı. Bul jerde zamanagóy sanlı sheshimler, atap aytqanda, intellektuallıq robotlastırılǵan tiykarǵı qoymaxananıń jumısına itibar qaratıldı. Bul qoymaxana joqarı nátiyjeli logistika hám tovar aǵımların avtomatlastırılǵan basqarıwdı támiyinleydi.
Itibarlı tárepi sonda, KPI zavodınıń tayar ónim qoymaxanası Oraylıq Aziyada birden-bir bolıp esaplanadı. Tanısıw waqtında zavodta engizilgen «Computer Vision» sisteması da tanıstırıldı. Qazaqstanlı qánigeler tárepinen islep shıǵılǵan bul sanlı sheshim sanaat qáwipsizligi qaǵıydalarına ámel etiliwin jasalma intellekt járdeminde baqlaw imkaniyatın beredi.
Bunnan soń, Atıraw neftti qayta islew zavodı (OOO«ANPZ») jumısı da úyrenildi. Bul kárxanada zamanagóy SCADA sistemaları, Big Data tiykarındaǵı prediktiv tallaw platforması, texnologiyalıq qáwipsizlik hám qáwip-qáterlerdi basqarıwǵa qaratılǵan moduller engizilgen. Bul processte ekologiyalıq kórsetkishlerdi sanlı monitoring etiw hám energiya nátiyjeliligin arttırıwǵa ayrıqsha itibar beriledi.
Ulıwma alǵanda, bul xızmet saparı «Ózbekneftgaz» AJ ushın Qazaqstannıń jetekshi sanaat obektlerinde engizilgen sanlı transformaciya tájiriybesi menen tanısıw, birge islesiw sheńberin keńeytiw hám tarawda innovaciyalıq kózqaraslardı ámeliyatqa engiziwde úlken áhmiyetke iye.

N.Ziyodullaeva, ÓzA