Berdaq atındaǵı Qaraqalpaq mámleketlik universiteti rektorı, akademik A.Reymov universitette “Keleshekke qádem” baǵdarlaması sheńberinde alıp barılıp atırǵan jumıslar menen tanıstı. Bul baǵdarlama sheńberinde pitkeriwshi studentlerdiń bántligin támiyinlew hám olardıń miynet bazarına tabıslı integraciyasın qollap-quwatlawǵa qaratılǵan ilajlar ámelge asırılmaqta, – dep maǵlıwmat beredi QMU Baspasóz xızmeti bólimi.

Sonday-aq, pitkeriwshilerdiń jumısqa jaylasıwına hám olardıń biznes ideyaların ámelge asırıw ushın biznes kónlikpelerin qáliplestiriwge járdem beriw baǵdarında jumıslar alıp barılmaqta.
Bunnan soń, universitettiń registrator ofisinde studentler ushın jaratılǵan sharayatlar kózden ótkerildi. Házirgi waqıtta universitet registratorı ofisiniń zamanagóy talaplarǵa juwap beretuǵın ortalıǵı jaratılıp, onda elektron málimleme sistemaları, onlayn hújjet aylanısı hám studentler ushın qolaylı interfeyske iye xızmetler engizilgen.
Rektor registrator ofisi xızmetkerleri menen sáwbet ótkerip, olarǵa óz usınısların bildirdi. Sáwbetlesiw dawamında ofis qánigelerine bar imkaniyatlardan nátiyjeli paydalanıw, xızmet sapasın jáne de jaqsılaw hám studentler menen qarım-qatnastı kúsheytiw boyınsha áhmiyetli usınıslar berildi.

Qaraqalpaqstan xabar agentligi