Tórtkúl rayonı “Beruniy” máhállesinde Ózbekstan Respublikası Prezidentiniń Xalıq qabıllawxanası hám Qaraqalpaqstan Respublikası Ádillik ministrligi tárepinen kóshpeli qabıllaw shólkemlestirildi.

Qabıllawda Qaraqalpaqstan Respublikası Ádillik ministri E.Tursunov hám Prezident Xalıq qabıllawxanasınıń Tórtkúl rayonı boyınsha baslıǵı U.Saburov puqaralar menen tikkeley sóylesti. Onda jámiyetshilik penen jaqınnan pikirlesip, olardıń hár qıylı máseleler boyınsha múrájatları dıqqat penen úyrenildi, – dep maǵlıwmat beredi rayon hákimligi Málimleme xızmeti bólimi.
Qabıllaw dawamında xalıqtıń turaq jay kadastrına baylanıslı hújjetlerin rásmiylestiriw, mayıplıǵı bolǵan shaxslardıń huqıqları hám sociallıq qorǵawǵa baylanıslı múrájatları ayrıqsha kórip shıǵılıp, olarǵa tolıq túsinikler berildi. Sonday-aq, bir qatar múrájatlar tiyisli tártipte qadaǵalawǵa alındı hám úyreniw ushın juwapker uyımlarǵa jiberildi.
Jámi 8 múrájat tekseriwler talap etiliwi sebepli belgilengen tártipte dizimge alınıp, qadaǵalawǵa alındı. Bul múrájatlar tez arada anıqlanıp, tiyisli ilajlar kóriletuǵını atap ótildi.
Bul kóshpeli qabıllaw puqaralardıń mámleketlik uyımlarǵa isenimin bekkemlew, olardıń huqıqları menen máplerin qorǵawǵa qaratılǵan áhmiyetli sociallıq-huqıqıy ilajlardan biri sıpatında áhmiyetke iye.

Qaraqalpaqstan xabar agentligi