Beruniy rayonında 2025-jıl zúrááti ushın jetistirilgen ǵálle ónimin nabıt etpesten orıp-jıynaw máwsimin shólkemleskenlik penen ótkeriw boyınsha belgilengen ilajlar nátiyjeli dawam etpekte.

Beruniy rayonında 2025-jıldıń ónimi ushın 182 ǵálle jetistiriwshi subektler tárepinen 3800 gektar maydanǵa gúzgi masaqlı dán eginleri egilgen. Bul ǵálle egilgen maydanlardan jámi 11400 tonna, sonnan jámi tovarlıq dánnen 10700 tonna hám tuqımlıq dánnen 700 tonna jetistiriliwi belgilengen.
Sonday-aq, jetistiriletuǵın tovarlıq dánniń 3350 tonnası (29,4 procenti) mámleketlik resurs sıpatında satıp alınatuǵın biyday hám qalǵan 7350 tonnası (64,5 procenti) dán kárxanasında waqtınsha saqlanǵan halda “birja”da erkin bahada satılıwı belgilenbekte.
– «Ǵálle-2025-jıl» orım-jıyın máwsimin shólkemleskenlik penen ótkeriw maqsetinde 15 otryad dúzilip, otryadlarǵa Ishki isler bólimi, Ayrıqsha jaǵdaylar bólimi hám rayon hákimliginen juwapkerler tartıldı,-deydi Beruniy rayonı hákimliginiń awıl xojalıǵı bólimi baslıǵınıń orınbasarı R.Abduraymov.
Sonday-aq, bul otryadlarǵa 15 kombayn, dán tasıw ushın 45 júk avtomashinası, 102 traktor tirkemeleri, 14 kóshpeli ustaxana, 14 janılǵı tasıw quralları biriktirildi.
Házirgi kúnge shekem rayondaǵı gúzlik biyday egilgen 664 gektar jerden 1997 tonna biyday orıp-jıynap alındı. Bul jumıslar nátiyjeli dawam etpekte.

Á.Jiyemuratov,
Qaraqalpaqstan xabar agentligi