Qaraqalpaqstan Respublikası Awıl xojalıǵı ministrligi xızmetkerleriniń mazmunlı dem alıwın shólkemlestiriw maqsetinde Moynaq rayonına sayaxat shólkemlestirildi.

Ishki turizmdi rawajlandırıw, puqaralardıń tariyxıy-mádeniy miyras obektleri menen jaqınnan tanısıwı ushın sharayat jaratıw, sonday-aq, xızmetkerlerdiń ekologiyalıq bilimin arttırıw hám watansúyiwshilik sezimlerin kóteriw maqsetinde Qaraqalpaqstan Respublikası Awıl xojalıǵı ministrligi hám ministrlik janındaǵı kásiplik awqamı komitetiniń baslaması menen Qurban hayıt bayramı múnásibeti menen Moynaq rayonına sayaxat shólkemlestirildi.
Bul sayaxat qatnasıwshılarda tereń tásir qaldırdı. Xızmetkerler tek ǵana regionnıń quramalı ekologiyalıq jaǵdayı emes, al onıń tariyxıy áhmiyeti menen de jaqınnan tanısıw múmkinshiligine iye boldı.
– Prezidentimizdiń baslaması menen ishki turizmdi rawajlandırıw, tarawlarda jumıs islep atırǵan xızmetkerlerdiń mádeniy hám ruwxıy jaqtan dem alıwın shólkemlestiriw maqsetinde bir qatar ilajlar ámelge asırılmaqta,-deydi Awıl xojalıǵı ministrliginiń kásiplik awqamı shólkeminiń baslıǵı Marat Qurbaniyazov.
Hár hápteniń shembi hám ekshembi kúnleri tariyxıy, zıyarat hám mádeniy orınlarǵa sayaxatlar shólkemlestirilip xızmetkerlerdiń mazmunlı dem alıwı támiyinlenbekte. Ministrliktiń apparatında jumıs isleytuǵın bir topar xızmetkerler menen azanda Nókis aeroportınan samolyotta Moynaqqa yarım saatta qıynalmay jetip keldik. Sayaxatımız saat 15:30ǵa shekem dawam etip, 16:00de jáne samolyot penen Nókiske qayttıq.
Sayaxat dawamında Moynaq rayonında jaylasqan hám Aral teńizi túbinde payda bolǵan “Kemeler qoyımshılıǵı”n, sonday-aq, Aralboyı ekologiyalıq apatshılıǵı hám tariyxıy processler haqqında maǵlıwmat beretuǵın “Aral teńizi tariyxı” muzeyin barıp kórdik. Aramızda Moynaqqa kelip kórmegenler de bar eken. Bul jerde Moynaq haqqında kóplegen maǵlıwmatlarǵa iye boldı.
Sayaxat dawamında qánigeler tárepinen Aralboyı aymaǵında júzege kelgen ekologiyalıq mashqalalar, olardıń aqıbetleri hám bul baǵdardaǵı reformalar haqqında maǵlıwmatlar berildi.

Á.Jiyemuratov,
Qaraqalpaqstan xabar agentligi