Qaraqalpaqstan Respublikası Ministrler Keńesiniń Baslıǵı F.Ermanovtıń Berdaq atındaǵı Qaraqalpaq mámleketlik universitetinde joqarı oqıw orınların tamamlap atırǵan jaslarǵa miynet bazarındaǵı bar imkaniyatlar haqqında tolıq maǵlıwmat beriw, olardıń bántligin támiyinlewde ámeliy járdem kórsetiw, sonday-aq, olardıń baslamaların tıńlaw hám mashqalalarına sheshim tabıw maqsetinde pitkeriwshi student-jaslar menen ushırasıwı bolıp ótti.

Ilajǵa tiyisli ministrlikler hám shólkemlerdiń basshıları, Berdaq atındaǵı Qaraqalpaq mámleketlik universiteti rektorı, akademik A.Reymov basshılıǵındaǵı universitet prorektorları, barlıq fakultettiń dekanları, dekan orınbasarları hám pitkeriwshi student-jaslar qatnastı.
Ushırasıwda F.Ermanov Ózbekstan Respublikası Prezidentiniń 2025-jıl 14-fevraldaǵı PQ-61-sanlı “Joqarı bilimlendiriw mákemeleri pitkeriwshileriniń jumısqa ornalasıwına járdemlesiw boyınsha qosımsha ilajlar haqqında”ǵı qararınıń áhmiyeti hám onda názerde tutılǵan wazıypalar haqqında keń túrde túsinik berdi.
-Prezidentimizdiń bul qararı, bárinen burın, pitkeriwshilerdiń miynet bazarına sáykes túrde tayarlanıwın, olardıń qánigeligi boyınsha jumısqa jaylasıwın sistemalı jolǵa qoyıwdı názerde tutadı,-deydi Berdaq atındaǵı Qaraqalpaq mámleketlik universiteti tariyx fakultetiniń dekanı Salamat Sulaymanov.-Ushırasıwda usı qarar sheńberinde ámelge asırılıp atırǵan jumıslar, ásirese, Qaraqalpaqstan Respublikasında bul baǵdarda alıp barılıp atırǵan jumıslarǵa toqtap ótildi.
Ilajda student-jaslar tiyisli taraw basshılarına ózlerin qızıqtırǵan sorawlar boyınsha múrájat etti.
Ilajda sorawlar tiykarınan – pitkeriwshi studentlerdiń bántligi, bos jumıs orınları, jumıs beriwshiler menen baylanıslar, isbilermenlik jumısın baslaw imkaniyatları, mámleket tárepinen berilip atırǵan jeńillikler hám subsidiyalar, sonday-aq, sociallıq qorǵaw máselelerine qaratıldı.
Ushırasıwda taraw qánigeleri, ministrlikler hám shólkemlerdiń wákilleri jaslardıń sorawlarına hár tárepleme juwap berip, ózlerinde bar imkaniyatlar hám baǵdarlamalar haqqında maǵlıwmatlar berdi.
Ilaj sońında F.Ermanov pitkeriwshi jaslarǵa joqarı isenim bildirip, olardı belsendi hám pidayı bolıwǵa shaqırdı. Sonday-aq, hár bir jastıń bántligi hám keleshegi mámleket itibarında ekenin, bul baǵdarda barlıq zárúrli ilajlar kórilip atırǵanın atap ótti.
Bul ushırasıw student-jaslar ushın tek ǵana motivaciyalıq ruwx emes, al, ámeliy jaqtan paydalı bolǵan pikirlesiw maydanına aylandı.
Ushırasıw dawamında bildirilgen usınıs hám múrájatlar boyınsha juwapker shólkemlerge tiyisli tapsırmalar berildi.

Adilbay Orazov,
Qaraqalpaqstan xabar agentligi sholıwshısı.