Beruniy rayonındaǵı Jaslar orayında sudyalardıń jaslar menen ushırasıwı hám kóshpeli sud májilisi ótkerildi.

Ilajǵa Beruniy rayonı Jınayat isleri boyınsha sudınıń tergew sudyası I.Allaniyazov hám Nókis rayonlar aralıq hákimshilik sudınıń sudyası A.Salievlar qatnastı.

Ushırasıw dawamında tergew sudyası I.Allaniyazov jaslar arasında jınayatshılıq hám huqıqbuzarlıqlardıń aldın alıw, bul illetlerdiń unamsız aqıbetleri haqqında aytıp, nızamshılıqtaǵı belgilengen tártipler hám jaslardıń huqıqıy sanasın arttırıw boyınsha alıp barılıp atırǵan jumıslar boyınsha jaslarǵa hár tárepleme túsinik berdi. Sonday-aq, Ózbekstan Respublikası Prezidentiniń 2025-jıl 22-yanvardaǵı PQ-1-sanlı qararı tiykarında máhállelerde qáwipsiz ortalıqtı jaratıw, huqıqbuzarlıqlardıń erte aldın alıw sistemasınıń nátiyjeliligin arttırıw baǵdarında ámelge asırılıp atırǵan ilajlar haqqında da maǵlıwmat berdi.
Nókis rayonlar aralıq hákimshilik sudınıń sudyası A.Saliev bolsa Ózbekstan Respublikasınıń 2025-jıl 11-marttaǵı ÓRN-1047-sanlı nızamınıń áhmiyetin atap ótip, usı nızam tiykarında sud sistemasında jaratılǵan qolaylıqlar, atap aytqanda, sud processlerin aralıqtan turıp (onlayn túrde) ótkeriw imkaniyatı haqqında maǵlıwmat berdi. Sudya sud májilisiniń real waqıt rejiminde aralıqtan turıp qanday shólkemlestiriliwi múmkin ekenligin jaslardıń qatnasıwında ámeliy túrde kórsetip berdi. Bul bolsa, jaslar ushın zamanagóy sud sistemasınıń imkaniyatların tikkeley baqlaw imkaniyatın jarattı.
Sonday-aq, jınayat isleri boyınsha Beruniy rayonı sudınıń tergew sudyası I.Allaniyazov tárepinen jınayatshılıq hám huqıqbuzarlıqtıń aqıbetlerin túsindiriw maqsetinde kóshpeli sud procesi shólkemlestirildi. Jaslar bul sud májilisinde tikkeley qatnasıp, sud procesiniń barısın ámeliy jaqtan baqlaw imkaniyatına iye boldı.
-Ótkerilgen ushırasıw jaslardıń huqıqıy bilimin arttırıw hám huqıqıy mádeniyatın bekkemlewde úlken áhmiyetke iye boldı,-deydi Nókis rayonlar aralıq hákimshilik sudınıń sudyası A.Saliev.
Ilaj dawamında sudyalar jaslardıń qızıqtırǵan sorawlarına tolıq juwap berdi.

Adilbay Orazov,
Qaraqalpaqstan xabar agentligi sholıwshısı.