Oliy Majlis Nızamshılıq palatasınıń májilisinde tólem xızmetleri menen baylanıslı hújjet – tólem sisteması operatorları hám tólem shólkemleriniń jumısın jetilistiriwge qaratılǵan nızam joybarı ekinshi oqıwda kórip shıǵıldı.

Búgingi kúnde tólem xızmetlerin kórsetiwshi kommerciyalıq bankler hám tólem shólkemleri tárepinen tólem xızmetlerin kórsetiw procesinde operaciyalıq, likvidlik, kredit hám kiberhújim qáwipleriniń payda bolıw jaǵdayları kóp ushırasıp atırǵanlıǵın atap ótiw kerek.
Bul nızam joybarı menen “Ózbekstan Respublikasınıń Oraylıq banki haqqında”ǵı, “Akcionerlik jámiyetleri hám akcionerlerdiń huqıqların qorǵaw haqqında”ǵı, “Tólemler hám tólem sistemaları haqqında”ǵı, “Licenziyalaw, ruqsat beriw hám xabardar etiw tártip-qaǵıydaları haqqında”ǵı nızamlarǵa tiyisli ózgerisler hám qosımshalar kirgiziw názerde tutılmaqta.
Deputat Adham Nazirqulovtıń atap ótkenindey, sanlı tólem xızmetlerin usınıwda sociallıq injiniring hám kiberjınayatshılıq penen baylanıslı qáwip-qáterler túriniń artıp baratırǵanı sebepli barlıq tólem sisteması operatorlarına qáwip-qáterlerdi basqarıw sistemasın engiziw hám Oraylıq bank tárepinen belgilengen minimal talaplarǵa muwapıq bolıwın támiyinlew júklenbekte. Tólem shólkemleri tólem jumısınıń kólemine bola, eki kategoriyaǵa ajıratılıp, áhmiyetli tólem shólkemi túsinigi kirgizilmekte.
Tólem terminalları hám virtual tólem terminallarınıń huqıqıy statusı anıq belgilep berilmekte. Aldawshılıqqa qarsı antifrod sistemaların engiziw minnetlemesi názerde tutılmaqta. Tólem xızmetleri bazarında ashıq-aydınlıq hám jumıstıń úzliksizligin támiyinlewge qaratılǵan talaplar kúsheytilmekte.
Atap ótilgenindey, nızam joybarınıń qabıl etiliwi tólem xızmetleri bazarında qáwipsizlikti támiyinlew, qarjı boyınsha aldawshılıqlardıń aldın alıw hám tutınıwshılardıń huqıqların jáne de nátiyjeli qorǵawǵa xızmet etedi.

ÓzA