Berdaq atındaǵı Qaraqalpaq mámleketlik universiteti hám Al-Farobiy atındaǵı Qazaq milliy universiteti arasında qol qoyılǵan birge islesiw memorandumına tiykarlanıp, akademiyalıq mobillik hám óz-ara tájiriybe almasıw maqsetinde Shet tilleri fakultetiniń bir topar professor-oqıtıwshıları hám kafedra baslıqları Qazaqstan Respublikasınıń Almatı qalasında xızmet saparında bolıp tur,- dep maǵlıwmat beredi QMU Baspasóz xızmeti bólimi.

Sapar sheńberinde, Al-Farabiy atındaǵı Qazaqstan milliy universitetiniń joqarı bilimlendiriw sistemasındaǵı jetiskenlikleri, atap aytqanda, kafedralar jumısındaǵı aldınǵı tájiriybeler hám bilimlendiriw procesine engizilgen jańa texnologiyalar menen jaqınnan tanısıw imkaniyatına iye boldı.
Professor-oqıtıwshılar ilimiy izertlewler, zamanagóy oqıtıw usılları hám ámeliyatqa tiykarlanǵan bilimlendiriw metodikası menen tanıstı. Sonday-aq, sapar dawamında seminar hám sheberlik sabaqları da shólkemlestirildi.
Bul akademiyalıq mobillik baǵdarlaması Ózbekstan hám Qazaqstan arasındaǵı bilimlendiriw tarawındaǵı birge islesiwdiń ámeliy kórinisi bolıp, ol keleshekte jańa ilimiy hám ámeliy baslamalardı birgelikte islep shıǵıw ushın bekkem tiykar bolıp xızmet etedi.

Qaraqalpaqstan xabar agentligi