Qubla Koreyanıń «ECOBIO Holdings Co., Ltd» kompaniyası shıǵındılardı qayta islew hám olardan energiya dereklerin alıw boyınsha pútkil dúnyaǵa belgili kompaniyalardıń biri bolıp, ol 1989-jıldan beri nátiyjeli jumıs alıp barmaqta.

Usı kompaniyanıń juwapker wákilleri respublikamızǵa da kelip, Qaraqalpaqstan Respublikası Ministrler Keńesiniń Baslıǵı F.Ermanov penen ushırastı.
Ushırasıwda F.Ermanov miymanlardı elimizge kelgeni menen qutlıqlap, mámleketimizde ekologiyanı qorǵaw, shıǵındılardı nátiyjeli basqarıw hám qayta tikleniwshi energiya dáreklerin rawajlandırıw, respublikamızdaǵı bar shıǵındılardı tańlap alıw, qayta islew hám olardı paydalı energiyaǵa aylandırıw imkaniyatları, bul baǵdardaǵı infrastruktura hám qollap-quwatlaw mexanizmleri haqqında keń túrde aytıp berdi.
Óz gezeginde qubla koreyalı isbilermenler de kompaniya tárepinen sońǵı jılları tarawǵa zamanagóy texnologiyalar engiziw, shıǵındılardı termikalıq hám biologiyalıq usılda qayta islew, sonday-aq, shıǵındıdan biogaz hám basqa da energiya resursların islep shıǵarıw boyınsha ámelge asırılǵan iri joybarlarlar haqqında maǵlıwmatlar berip, eki tárepleme óz-ara paydalı birge islesiw baǵdarları haqqında pikirlesti.

Adilbay Orazov,
Qaraqalpaqstan xabar agentligi sholıwshısı.