Qaraqalpaqstan Respublikası sudında prokuratura uyımları menen birgelikte ámeliy seminar ótkerildi.

Seminarǵa respublikamızdaǵı sudyalar hám Qaraqalpaqstan Respublikası prokuraturasınıń juwapker xızmetkerleri qatnastı.
Seminardı Qaraqalpaqstan Respublikası sudı baslıǵınıń orınbasarı, puqaralıq isleri boyınsha sudlaw kollegiyasınıń baslıǵı A.Kerimbaev basqarıp bardı.
Ilaj dawamında «Ózbekstan Respublikasınıń ayırım nızam hújjetlerine sudlarda islerdi kóriwde prokurordıń wákilliklerin támiyinlewge qaratılǵan ózgerisler hám qosımshalar kirgiziw haqqında»ǵı nızamnıń áhmiyeti keńnen dodalandı.
Bul nızam menen Ózbekstan Respublikasınıń Puqaralıq processual kodeksine mámlekettiń nızam menen qorǵalatuǵın máplerin qorǵaw maqsetinde prokurordıń qatnasıwı názerde tutılǵan bir qatar áhmiyetli ózgerisler hám qosımshalar kirgizildi. Atap aytqanda, prokurorǵa jerge baylanıslı huqıqıy qatnasıqlar, mámleketlik múlk, mámleketke jetkerilgen zıyannıń ornın qaplaw hám mámleketlik byudjetten óndiriwge baylanıslı islerde sudlarda qatnasıw hám mámleket máplerin qorǵaw ushın sudqa arza kirgiziw huqıqı berildi.
Seminar dawamında usı nızamnıń orınlanıwın támiyinlewde sudlar hám prokuratura uyımlarınıń óz-ara birge islesiwi, prokurordıń qatnasıwı belgilengen islerdiń sud májilislerinde kórip shıǵılıw tártibi, bul wákilliklerdiń ámeliy qollanılıwı sıyaqlı máseleler boyınsha tájiriybe almastı.
Ilaj juwmaǵında qatnasıwshılar puqaralıq islerin kóriwde prokuror qatnasın támiyinlewde sud ámeliyatında ushırasıp atırǵan máseleler, olardıń sheshimleri boyınsha pikirlesip, ózlerin oylandırıp júrgen máselelerge tiyisli juwap aldı.

Adilbay Orazov,
Qaraqalpaqstan xabar agentligi sholıwshısı