Franciyanıń Nissa qalasında BMSh baslaması menen shólkemlestirilgen okeanlar boyınsha úshinshi xalıqaralıq konferenciya jumıs basladı. Ekologiya menen baylanıslı global mashqalalardı saplastırıw jolında gezektegi áhmiyetli qádem esaplanǵan bul ánjumanǵa 60 qa shamalas mámleket hám húkimet basshıları, jetekshi ilimpazlar, mámleketlik emes shólkemler hám biznes-shólkemleriniń wákilleri qatnaspaqta.

Konferenciyanıń tiykarǵı maqseti – global ısıw, pataslanıw hám dáreklerden nadurıs paydalanıw aqıbetinde kriziske ushırap atırǵan okean ekosistemasın saqlap qalıwǵa qaratılǵan anıq ámeliy ilajlardı islep shıǵıw.
Qánigeler ánjuman aldınan tayarlaǵan hújjette okeanlardı qorǵaw boyınsha 10 tiykarǵı usınıs alǵa qoyılǵan. Házirgi processte okean túbinen paydalı qazılmalardı qazıp alıwdı tolıq qadaǵan etiw hám mámleketlerdiń yurisdikciyasına kirmeytuǵın suw aymaǵında biologiyalıq kóptúrlilikten ádil paydalanıw máselesi ayrıqsha orın iyeleydi.
Sammit dawamında ekologlar tereń teńiz resurslarınan paydalanıw boyınsha moratoriydi keńeytiw zárúrligin jáne bir márte atap ótti.
Franciya Prezidenti Emmanuel Makronnıń sózlerine bola, bul baslamanı házirshe 30 mámleket qollap-quwatlaǵan. Ol qalǵan mámleketlerdi de global baslamanı qollap-quwatlawǵa shaqırdı.
Haqıyqatında da, dúnyadaǵı eń iri teńiz mámleketi – AQSh bul áhmiyetli ilajǵa húkimetten delegaciya jibermegen. Franciya mámleketi jetekshisi bul jaǵdaydı sınǵa alıp, bul mámleket klimat máselesi boyınsha materiallıq járdem mexanizminen shıǵıp ketkenin keskin qaraladı. Onıń atap ótiwinshe,…«sebebi xalıq aralıq ilim elege shekem kóp tárepleme Amerikanıń qarjısına súyenedi».
Rásmiy dárejede qatnaspaǵan bolsa da, Qurama Shtatlardıń ayırım jaǵalıq qalalarınıń wákilleri ánjumanda jeke ózi qatnasıw ushın Niccaǵa kelgen. Demek, okean artında da ekologiyalıq qáweter joqarı.

K.BEKJANOV, ÓzAnıń xabarshısı