Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń «Jaslar aylıǵı» sheńberinde Qońırat rayonındaǵı belsendi jaslar menen ushırasıwı ótkerildi.

Ushırasıw sheńberinde dáslep, bos jumıs orınları miynet yarmarkası ótkerildi.
Yarmarkada 44 mákeme hám shólkem 154 bos jumıs orınları menen qatnastı. Onda bir qatar jaslar jumıs orınlarına jaylastırılǵan bolsa, jáne bir topar hayal-qızlarǵa qayta kásipke baǵdarlaw boyınsha jollamalar berildi.
Bunnan soń IT tarawı qánigeleri tárepinen tarawdı rawajlandırıw, IT xızmetlerin usınıwdı jolǵa qoyıw, azǵana qunt etiw arqalı mol dáramat alıwdı jolǵa qoyıw sonday-aq, Sırtqı biyǵárez járdem qarjıların (grantlardı) tartıw hám donorlar menen islesiw bólimi tárepinen jaslardıń isbilermenligin rawajlandırıw hám hár qıylı joybarlar boyınsha jumıs islewi ushın grant qarjıların keńnen tartıw usılları kórsetilgen prezentaciyalar, maǵlıwmatlar usınıldı. Bunnan tısqarı, Prezidentimizdiń tapsırması menen jaslar banki sıpatında járiyalanǵan Aloqa banktiń Qaraqalpaqstan Respublikası basqarması baslıǵı, Milliy bankttıń juwapker qánigeleri tárepinen jaslardıń isbilermenligin jolǵa qoyıw hám bar joybarlardı keńeytiw boyınsha jaratılǵan imkaniyatlar haqqında keń túrde maǵlıwmat berildi.
Ushırasıwda dáslep respublikamız basshısı elimizde jaslardı hár tárepleme qollap-quwatlaw máselesi mámleketlik siyasattıń baslı baǵdarlarınıń birine aylanǵanı, Prezidentimizdiń jaslarǵa degen joqarı isenimi, ayrıqsha itibarı hám atalarsha ǵamxorlıǵı nátiyjesinde olar ushın barlıq imkaniyatlar jaratılıp atırǵanlıǵın ayrıqsha qanaatlanıwshılıq penen atap ótti.
Atap ótilgenindey, Prezidentimizdiń basshılıǵında jaslardı qollap-quwatlaw boyınsha bir qatar nızam, párman hám qararlar qabıl etildi. Zamanagóy bilimlendiriw mákemeleri ashıldı, isbilermenlik baǵdarı boyınsha kóplegen jeńillikler berildi. Bilimlendiriw, mádeniyat, sport hám basqa da tarawlardaǵı jaslarımız materiallıq hám ruwxıy jaqtan qollap-quwatlanbaqta. Ásirese, Prezidentimizdiń 213-sanlı tariyxıy pármanı menen joqarı oqıw orınlarında qaraqalpaqstanlı jaslar ushın óz aldına qosımsha kvotalar ajıratılıp atırǵanı olarǵa jańa imkaniyatlar esigin ashıp bermekte.
Óz gezeginde, qońıratlı jaslar da bunday itibar ushın Prezidentimizge ayrıqsha minnetdarshılıǵın bildirdi.
Ótkerilgen ushırasıw dawamında jaslar menen jaqınnan pikirlesip, olardıń tilek-ótinishleri, sonday-aq, usınısları tıńlandı. Atap aytqanda, jaslar tárepinen rayon aymaǵında zamanagóy kitapxana qurıw, isbilermenligin rawajlandırıw, parasport penen shuǵıllanıwı ushın qosımsha imkaniyatlar jaratıw, Bárkamal áwlad balalar mektebinde laboratoriya hám IT kursların shólkemlestiriw sıyaqlı áhmiyetli máseleler kóterildi.
Óz gezeginde hár bir baslama hám usınıs Joqarǵı Keńes Baslıǵı tárepinen belgilep alınıp, tez arada turmısqa engiziw boyınsha juwapkerlerge anıq tapsırmalar berildi.
Bunnan soń bir topar jaslar belsendiligi hám zamanlasları arasında ayrıqsha jetiskenliklerge erisip, kópshilikke úlgi bolıp atırǵanı ushın Qaraqalpaqstan Respublikası Joqarǵı Keńesi Prezidiumınıń qararı menen sıylıqlandı.
Ótkerilgen ushırasıw shın mánisinde Joqarǵı Keńes Baslıǵı hám jaslardıń tikkeley pikirlesiw maydanına aylandı hám bunday ushırasıwlar respublikamızdıń barlıq qala hám rayonlarında dawam ettiriledi.
Ushırasıwdan soń, Prezidentimizdiń Qaraqalpaqstan Respublikasındaǵı Xalıq qabıllawxanası, Joqarǵı Keńestiń juwapkerleri hám taraw basshılarınıń qatnasıwında jaslardıń mashqalaların tıńlaw maqsetinde qabıllaw ótkerilip, mashqalalardıń sheshimin tabıw ilajları kórildi.

Qaraqalpaqstan xabar agentligi