Ámiwdárya rayonındaǵı «Baǵ» máhállesindegi jetekshi xojalıqlardan biri Raximbaev Azizbek fermer xojalıǵınıń biyday atızında ǵálle orımına baǵıshlanǵan ámeliy seminar shólkemlestirildi.

Ilajda Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A. Jumanazarov, Sanaat, qurılıs, transport hám baylanıs máseleleri komitetiniń baslıǵı I. Sdikov, rayon hákimi S. Xojametov, hákim orınbasarları, awıl xojalıǵı tarawınıń qánigeleri, nuraniylar, fermerler, jámiyetshilik wákilleri hám ǵalaba xabar qurallarınıń wákilleri qatnastı.
Seminarda rayon hákimi S. Xojametov shıǵıp sóylep, ǵálle máwsimi hár bir fermer, hár bir diyqan ushın áhmiyetli sınaq dáwiri bolıwı menen birge, elimizdiń azıq-awqat qáwipsizligi ushın oǵada úlken áhmiyetke iye ekenligin atap ótti.
Maǵlıwmat ornında aytıw kerek, rayonda 2025-jıldıń ónimi ushın 270 fermer xojalıǵı hám awıl xojalıǵı kárxanaları tárepinen 4800 gektar maydanǵa ǵálle egilip, usı maydanlardan jámi 11 mıń 130 tonna biyday jetistiriw rejelestirilgen.
Rayonda bıyılǵı jıldıń zúrááti ushın egilgen ǵálle ónimin 20-iyunǵa shekem zaya etpey orıp-jıynaw maqsetinde 23 otryad shólkemlestirilip, bul otryadlarǵa jámi 69 maman qánigeler biriktirilgen. Sonnan, 23 otryad basshıları, 23 IIB xızmetkeri, 23 AJB xızmetkeri biriktirilgen. 4800 gektar ǵálle maydanların orıp-jıynaw jumıslarına jámi 131 texnika biriktirilgen.
Seminar dawamında shıǵıp sóylegenler zúráátti optimal múddetlerde jıynap alıw, texnika hám mexanizatorlardıń tayarlıǵı, qáwipsizlik ilajlarına qatań ámel etiw, texnika hám mexanizatorlardıń tayarlıǵı, qáwipsizlik ilajlarına qatań ámel etiw, sonday-aq, ǵálleni atızdan qoymaxanaǵa sapalı jetkerip beriw boyınsha zárúr usınıslar berdi hám óz-ara pikir alıstı.
Bunnan soń, atız shetindegi zamanagóy kombaynlar háreketke túsirildi. Dáslepki orım-jıyın procesi kórgizbeli tárizde shólkemlestirilip, miymanlar fermer xojalıǵındaǵı texnikalıq potencial, jumısshı kúshiniń shólkemlestiriliwi hám agrotexnikalıq ilajlardıń ámeliy nátiyjesine tikkeley gúwa boldı.
Májilis qatnasıwshıları bul ilajdı tek ǵana tájiriybe almasıw emes, al miynetke, elge hám ırısqı-nesiybege bolǵan húrmettiń kórinisi sıpatında da qabıl etti. Bunday ruwxıy-aǵartıwshılıq ruwxında ótken seminarlar elimizdiń awıl xojalıǵında miynetkesh diyqanlardıń potencialın júzege shıǵarıw, olardı xoshametlew hám milliy qádiriyatlarımızdı bekkemlewde áhmiyetli orın iyeleydi.

Qaraqalpaqstan xabar agentligi