Erteń Tashkent qalasındaǵı «Bunyodkor» stadionında futbol boyınsha Ózbekstan saylandı komandası 2026-jılǵı Jáhán chempionatı 3-tańlap alıw basqıshınıń eń sońǵı turı sheńberinde Qatar saylandı komandasına qarsı oyınǵa túsedi.

Múddetinen burın Jáhán chempionatı jollamasın qolǵa kirgizgen mámleketimiz saylandı komandası bul oyında futbolshılar aq formada, dárwazaman qara futbolkada háreket etedi hám oyındı qıtaylı tóreshiler basqarıp baradı.
Atap aytqanda, ushırasıwdı qıtaylı Ma Ning basqarıp barsa, qanatlarda oǵan Jou Fei hám Jang CHeng járdemlesedi. 4-rásmiy tóreshi bolsa, Jin Jingyuan, VARda Fu Ming óz jumısın alıp baradı.
Maǵlıwmat ushın aytıp ótetuǵın bolsaq, Ózbekstan saylandı komandası usı kúnge shekem Tashkentte Qatar menen 6 márte ushırasıp, olardıń barlıǵında jeńip shıǵıwǵa miyasar bolǵan. Bul oyınlardıń tórtewi Jáhán chempionatı tańlap alıw oyınlarına tuwra kelse, birewi Aziya Kuboginiń tańlap alıw basqıshında, birewi doslıq ushırasıwı sheńberinde ótkerilgen.
Erteńgi ushırasıw saat 18:45 te baslanadı.

Adilbay Orazov,
Qaraqalpaqstan xabar agentligi sholıwshısı.