Qanlıkól rayonındaǵı Altınkól awıl puqaralar jıyını aymaǵında jaylasqan “Shaxnoz Asel” fermer xojalıǵında 2025-jıldıń zúrááti ushın jetistirilgen biydaydıń orım-jıyın jumısların tez hám sapalı ótkeriwge arnalǵan ámeliy kórgizbeli seminar keńesi bolıp ótti.

Seminarda, rayon hákimi B.Sultanov, tiyisli taraw basshıları, fermerler, otryad baslıqları qatnastı.
Awıl xojalıǵı tarawında dán ǵárezsizligin támiyinlew, biydaydan mol ónim alıwda aldınǵı tájiriybeler atap ótilip, fermer xojalıqlarınıń bul baǵdardaǵı úlesi jıl sayın artıp atırǵanı ayrıqsha tilge alındı.
Seminar dawamında bıyılǵı jılı ǵálleni sapalı hám qısqa múddette jıynap alıw boyınsha óz-ara pikir alısıp, anıq wazıypalar belgilep alındı.
Seminarda jası úlken nuranıylar jańa istiń baslanıwı menen jaqsı niyetlerge aq pátiyaların berdi.
Rayonda, usı jıldıń zúrááti ushın jámi 152 fermer xojalıqları tárepinen 4200 gektar maydanda biyday jetistirilgen. Biyday ónimlerin tez hám sapalı orıp jıynap alıw islerine arnalǵan arnawlı taktikalıq oqıw shınıǵıwına tiykarlanǵan seminar da ótkerildi.
Klaster hám diyqan, sharwashılıq fermer xojalıqları tárepinen egilgen biydaydıń tárbiyası, belgilengen agrotexnikalıq ilajlar óz waqtında alıp barılıp, orıp-jıynaw jumısları da baslandı. 9 otryad dúzilgen bolıp, hár bir otryadqa joqarı ónimdarlı 1 kombayn, avtomashina hám traktor tirkemeleri texnikalıq xızmet kórsetiwshi texnikalar biriktirilgen.
Seminarda biyday ónimlerin tez kúnde sapalı orıp jıynap alıw ilajları belgilendi.

Qaraqalpaqstan xabar agentligi