Jınayatshılıq hám huqıqbuzarlıqlardıń aldın alıw, jaslar arasında huqıqıy sana hám mádeniyattı arttırıw maqsetinde, orınlarda sudlar tárepinen ámeliy jumıslar alıp barılmaqta. Usınday ilajlardan biri Nókis rayonlar aralıq hákimshilik sudınıń sudyaları tárepinen Nókis qalasındaǵı Jaslar orayında shólkemlestirildi.

Onda Nókis rayonlar aralıq hákimshilik sudınıń baslıǵı R.Jumabaev shıǵıp sóylep, jaslar arasında ushırasıp atırǵan jınayatlar hám olardıń aldın alıw boyınsha alıp barılıp atırǵan jumıslar, atap aytqanda, jaslar arasında jınayashılıqtı azaytıw ushın ámelge asırılıp atırǵan profilaktikalıq ilajlar, tálim-tárbiya jumısları hám onda huqıqıy úgit-násiyat ilajlarınıń áhmiyetine toqtap ótti.
Bunnan soń Nókis rayonlar aralıq hákimshilik sudınıń sudyaları A.Saliev, Q.Babanazarov hám S.Karamatdinovalar basshılıǵında kóshpeli sud májilisi ótkerildi.
Májiliste real sud dodalawı kórsetilip, onda tiykarınan pensiya tayınlawǵa baylanıslı hákimshilik dawlar kórip shıǵılıp, sud procesinde pensiya támiynatına baylanıslı máseleler, puqaralardıń huqıqları hám olardı qorǵaw tártibi dodalandı.
Sudyalar tárepinen qatnasıwshılarǵa istiń huqıqıy tiykarları, dálillerdi bahalaw procesi hám qabıl etilgen qarardıń áhmiyeti túsindirildi. Sonday-aq, jaslarǵa hákimshilik huqıqbuzarlıqlardıń aqıbeti, puqaralıq juwapkershilik hám nızam ústinliginiń áhmiyeti haqqında da maǵlıwmatlar berildi.
-Bunday ilajlar jaslar arasında huqıqıy mádeniyattı, puqaralardıń huqıqıy xabardarlıǵın arttırıw hám nızamlılıqtı bekkemlewde úlken áhmiyetke iye,-deydi Nókis rayonlar aralıq hákimshilik sudınıń sudyası A.Saliev.-Ilajda qatnasqan jaslar sud procesin baqlaw arqalı sudlar jumısı menen jaqınnan tanısıw imkaniyatına iye boldı.

Adilbay Orazov, Qaraqalpaqstan xabar agentligi sholıwshısı.