Futbol boyınsha Aziya regionında Jáhán chempionatı saylap alıwınıń úshinshi basqıshında 10-tur oyınları erteń, 10-iyun kúni bolıp ótedi.

Usı tur sheńberinde Ózbekstan – Qatar, Qırǵızstan – BAÁ, Iran – KXDR, Palestina – Oman, Iordaniya – Irak, Qubla Koreya – Kuveyt, Yaponiya – Indoneziya, Saudiya Arabstanı – Avstraliya, Qıtay – Baxreyn saylandı komandaları óz-ara bellesedi.
Álbette, biziń bar itibarımız «Bunyodkor» stadionında bolıp ótetuǵın Ózbekstan hám Qatar saylandı komandaları arasındaǵı ushırasıwǵa qaratıladı. Oyın saat 18:45 te baslanadı hám onı qıtaylı tóreshiler basqaradı. Bas tóreshi – Ma Ning, oǵan qanatlarda Jo-yu Fei hám Jang CHeng járdem beredi. Tórtinshi tóreshi sıpatında Jin Jingyuan, VAR sistemasında bolsa Fu Ming isleydi.
Negizinde, bul ushırasıw hár eki komanda ushın jarıs táǵdirin sheshpeydi, sebebi Ózbekstan saylandı komandası álleqashan múddetinen aldın Jáhán chempionatına jollamanı qolǵa kirgizgen. Soǵan qaramastan, komandamız óz ıqlasbentleri ushın shıraylı oyın kórsetedi.
Maǵlıwmat ushın: Ózbekstan hám Qatar saylandı komandaları 2000-jıldan berli Jáhán hám Aziya chempionatınıń saylap alıw basqıshları, Aziya chempionatı jáne doslıq ushırasıwları sheńberinde jámi 16 márte ushırasqan. Bul oyınlardıń 9ında Ózbekstan jeńiske erisken, 3 ushırasıw teńbe-teń juwmaqlanǵan. 4 oyında bolsa Qatar komandası ústinlikke erisken. Toplar qatnası bolsa 27:17 Ózbekstan saylandı komandasınıń paydasına.

Javohir Toshxwjaev, ÓzA