Islam Kárimov atındaǵı Tashkent xalıqaralıq aeroportında Túrkiyanıń Bursa qalasında bolıp ótken qol urısı boyınsha jáhán chempionatı hám Greciyanıń Lutraki qalasında shólkemlestirilgen VIII «Pútkiljáhán sport oyınları – 2025» jarısında tabıslı qatnasqan Ózbekstan saylandı komandası saltanatlı túrde kútip alındı.

Bul máresimde Ózbekstan Huqıq qorǵaw uyımları qol urısı federaciyasınıń basshıları, hár qıylı ministrlikler hám uyımlardıń wákilleri, keń sport jámiyetshiligi, ǵalaba xabar qurallarınıń xızmetkerleri jáne sportshı hám trenerlerdiń ata-anaları qatnastı.
Usı jerde saylandı komandamızdıń eki iri xalıqaralıq jarısta kórsetken joqarı nátiyjelerine qısqasha toqtap ótiw orınlı.
Sonıń ishinde, 30-maydan 1-iyunǵa shekem Túrkiyanıń Bursa qalasında ótkerilgen úlkenler arasındaǵı jáhán chempionatında 32 mámleketten kelgen 300 den aslam sportshı qatnastı. Quwanıshlı tárepi sonda, Ózbekstan saylandı komandası bul abıraylı turnirde 8 altın, 3 gúmis hám bronza medalın qolǵa kirgizip, ulıwma komandalıq esapta birinshi orındı iyeledi.
Bunnan tısqarı, 3-8-iyun kúnleri Greciyanıń Lutraki qalasında ótkerilgen VIII «Pútkiljáhán sport oyınları – 2025» sheńberindegi qol urısı jarıslarında 15 mámlekettiń saylandı komandaları óz-ara kúsh sınastı. Qızǵın hám keskin bellesiwler astında ótken jarısta Ózbekstan wákilleri 13 altın, 3 gúmis hám 1 bronza medalın qolǵa kirgizip, ulıwma komandalıq esapta birinshi boldı. Sonday-aq, turnir dawamında 5 xalıqaralıq kategoriyadaǵı tóreshilerimiz bellesiwlerdi tabıslı basqarıp bardı.
Dúnya júzilik sport oyınları hár eki jılda bir márte ótkeriletuǵının atap ótiw kerek. 2023-jılǵı jarıs Italiyada ótkerilip, onda qol urısı bellesiwleri baǵdarlamaǵa kirgizilgen edi. Sol jarısta da Ózbekstan milliy saylandı komandası 30 dan aslam mámleket wákilleri arasında 7 altın hám 1 gúmis medaldı qolǵa kirgizip, ulıwma komandalıq esapta birinshi orındı iyeledi.
– Qol urısı boyınsha VIII «Pútkiljáhán sport oyınları – 2025» hám jáhán chempionatınıń -90 kg salmaq kategoriyasındaǵı bellesiwlerinde altın medaldı qolǵa kirgizip, xalqımız hám trenerlerimizdiń isenimin aqlaǵanımnan oǵada quwanıshlıman, – deydi Oǵabek Jumaniyazov. – Bunday jaqsı nátiyjeler mámleketimiz basshısı tárepinen elimizde barlıq sport túrleri qatarında qol urısı sportına da kórsetilip atırǵan joqarı itibardıń nátiyjesi bolıp esaplanadı. Sonlıqtan, sońǵı jılları Ózbekstan milliy saylandı komandası qol urısı boyınsha dúnya júzi kóleminde jetekshi orınlardı iyelep kelmekte. Keleshektegi iri xalıqaralıq jarıslarda da minberdiń eń joqarı tekshelerinen orın alamız, dep isenemiz.

Javohir Toshxwjaev, ÓzA